Citizenship Ammendment Bill

Citizenship Ammendment Bill chu Lok Sabha-ah put luh a niin pass a ni a, Rajya Sabha lamah ngaihtuah leh a ni ang. Lok Sabha-a Mizoram aiawhtu MP chuan CAB chu a thlawp thu a thusawinaah a sawi. Chief Minister chuan CAB duhlohna bandh NESO-in Hmar Chhaka an buatsaih Mizorama kalpui ve chu, 'Kan hriatthiampui khawp mai,' a ti. 

CAB hi a tira kan hmelhriat dan ang kha a ni ta lo a, Hmar Chhakin kan duh lo leh kan zavaia inlungrual taka kan do ang kha a ni ta lo deuh. Tunah chuan a huam chin an tidanglam a, India Hmar Chhak state tam zawk a huam ta lo. A tira duh lotu zinga ṭhenkhatin an pawm thei ta hi thil mak a ni lo ang. 

CAB kan duh loh khan Mizoram a huam tel vang chauha duh lo kan nih chuan kan duh loh chhan tak kha chu an hlip fel tawh a; amaherawhchu CAB kan duh loh chhan kha a nih phung, sakhuana avanga khua leh tui nih theihna a nih chuan CAB ṭhat loh dan hi a la ngai reng a tih theih ang. 

Eng sakhua emaw kan nih avanga India khua leh tui kan ni thei dâwn a nih chuan, sakhaw zalenna leh sakhaw intluktlanna ram kan nihna hi a dal ta hle tihna a ni. Chumi piah lamah a pu luttu lam hi Hindu ram din tuma intel khawm political party an ni a, he CAB hi chumi tihhlawhtlin an tumna kawng pawimawh tak niin a lang thei bawk. 

CAB hian min huam emaw min huam ta lo pawh ni se, CAB hi sakhaw behchhana dan siam danglamna a ni a, tute emaw party tana ṭha tur leh voter hmuh belhna tur lam hawi a nih avanga Mizo mipui nawlpuiin kan duh lo hi a inhmeh hle a ni.