VB-GRAM-G vanga inhnial
Ni 100 inhlawhna tia sawi mai ṭhin, Mahatma Gandhi National Rural Employment Guarantee Scheme (MGNREGS) chu Parliament-ah a tidanglam a; a hming pawh Viksit Bharat–Guarantee for Rozgar and Ajeevika Mission (Gramin) VB-GRAM-G tia thlak a ni.
MGNREGS-ah khan thingtlanga miretheite kum khat chhungin ni 100 inhlawhna siamsak an ni ṭhin a; VB-GRAM-G hnuaiah erawh chuan kum khatah ni 125 inhlawhna siam a ni dawn. Scheme atana sum hman tur chungchangah, MGNREGS-ah sorkar laipuiin a tum vek a, VB-GRAM-G ah chuan Mizoram sorkarin 10% a tum a ngai dawn thung.
MGNREGS leh VB-GRAM-G hi thil hrang hrangah inanna lai awm bawk mah se, a danglamna a awm nual. Tunlai hian Mizoram hmun hrang hrangah mipui hrilhfiahna hun buatsaih ṭhin a ni a, chanchin thar lamah puanzar a ni ṭhin bawk. Mipui pawhin lo hriat chian an tum ve a ṭha.
VB-GRAM-G chungchangah hian BJP leh Congress chu an thu a inkalh. Mizoramah pawh Congress party-in VB-GRAM-G an sawichhe char char a, press conference hial an koh phah tawh a; sorkar laipuia rorel lai BJP-in an fak viau thung.
VB-GRAM-G vanga Mizorama political party-te lo inhnial ve chiam hi a ṭul lem lo a, mipui tan a ṭangkai lo. Congress lamin an sawisel hi mipui tan thil ṭha zawk duhna vang aiin, an sorkar laia an lo siam, tihtawp duh lohna vang leh BJP hmalakna sawisel tum hrim hrim vang em ni chu aw tia ngaih theih tak a ni.
Khawvel a inher zelah sorkar dan, kalphung leh tih dante pawh a inthlâk ṭhin. Thingtlanga miretheite inhlawh theihna tura dan siam leh a kalphungte pawh a ngai ang reng a ni thei lo a, tihdanglam a ṭul hun a awm ang, hun tawn azirin a hming pawh thlak a ṭul thei.
VB-GRAM-G hian MGNREGS aiin ṭhat zawkna a nei ngei ang a, ṭhat loh zawkna pawh a neiin a rinawm. Tunah chuan VB-GRAM-G hi India ram pumah hman a ni ngei dawnin a lang a, thlak mai a nih a rinawm tawh rih lo.
Chuvangin, politics taka VB-GRAM-G sawisel vak hi a ṭul ber lo thei a, a ṭha lo thei a; ṭul lo leh awmze nei chuang si loa mipui tibuaitu mai a nih theih avangin chintâwk neih a ṭha e.