Lehkha chhiar uar zual zel ila

India ram puma lehkhabu chhiara inelna, Reading Decathlon-ah Mizorama sikul pahnih–Mount Carmel School, Chaltlang chu pahnihna a ni a, La Montessori School, Mission Veng chu pathumna a ni. Sikul pahnih aiawh hian zirlai pahnih ve ve an tel.

Sikul pahniha zirlaite Mizoram huap leh India hmarchhak huapa inelna an paltlang hnua ram pum huapa inelnaah pahnihna leh pathumna an ni pha hi a lawmawm a, an chhuanawm hle. An thawkrim hle ang tih a chiang a, an taimakna leh thawhrimna te chu Mizo ṭhalaite'n entawn thei ila a duhawm.

Ṭhalaite hma ngai a, ṭhalaite leh naupang zawkte'n lehkha chhiar an uar leh theihna tura hma latu Mizoram Youth Commission an fakawm a; hun kal zel turah pawh thâ thlah loin, ṭhahnemngai takin, nasa zawkin hma la zel se, lehkha chhiarah hma kan sawn chho zel ngei ang.

Lehkha chhiar tih hian chanchinbu leh lehkhabu a huam thei ang a; Mizo mipui, a bikin ṭhalaite'n lehkha chhiar an uar tawh lo hlea sawi a ni ṭhin a, thui takin a dik ang. Chutih rualin, ṭhalaite chauh ni loin, puitling zawk, rualú deuh zawkte pawh an bâng chuang lo a, anni pawhin tun hma an pha tawh lo viauin a lang.

Mizoram mipuiin lehkha kan chhiar tlem ta tih a lan chianna chu, kum 5-10 vel lek kal taa chanchinbu chhuak (copy) zat leh tuna chhuak zat inthlau ta lutuk hi a ni. Lehkhabu chhuak zat (copy) pawh a tlahniam tial tial a, lehkhabu hralh a har tial tial bawk. Chutih rualin, tun hnai têah chanchinbu ṭhenkhat copy a kâng leh hret a, lehkhabu pawh tlemin hralh a kal leh hreta sawi a ni a; a lawmawm.

Mizote'n lehkha kan chhiar tlem tak chhan ber chu internet ṭha ta viau leh social media chak ta lutuk hi a nih a rinawm. Internet kaltlangin thil tam tak kan hre thei tawh a, a ṭha hle. Mahse, internet-a kan hriat duhte lak a, internet kaltlanga thil chhiar hi hriatna a nghet lo zawka sawi a ni fo; mahni inchian a, a àwm tâwk hriat a ṭha.

Lehkha chhiarah Mizo mipuite kan zavaiin kan inenfiah a ngai a, ṭan kan lâk thar a ngai. Lehkha chhiar hi hriatna tipungtu, rilru leh ngaihtuahna dik min petu a nih avangin uar thar leh a ṭha e.