Press mite zalenna leh zahawmna humhalh

Hun eng emaw ti kal ta aṭang khan ram ni pawimawhah press mite namnûlna nia ngaih theih a thleng ta fo a, kumina Lammuala Republic Day lawmnaah press enclosure siam a ni lo ta hial. Republic Day leh Governor's At Home-a tel tura press mite sawmna pek chhuah dan pawhin sawi a hlawh hle.

Ram ni pawimawh leh sorkar hun pawimawhah hian democracy banpui palina tia sawi press mite ngaih pawimawh an ni ṭhin. Hmunpui leh hmunhma nei ṭha zawkah phei chuan mipui tihbuai loha an awm khawmna tur ṭha tak an siam a, awlsam zawka hna an thawh theih nan wifi leh ṭul dangte an chhawp hial ṭhin.

Media enclosure siam hi induhsakna uchuak tihlanna lam a ni lo a, mipui chîm buai loha media mite'n an hna an thawh theihna tura buatsaihna a ni. Hetiang hun pawimawhah hian ram hruaitu lute'n mipui tana hriat tur pawimawh bik sawina hun atan an hman fo avangin hun pawimawh bik leh chhinchhiah ngai bikte a awm ṭhin a ni.

Sorkar hian a thil tih, hmalakna leh VIP-te chet velna hrang hrang puan chhuahna tur Information and Public Relation department a nei a, sorkar hmanrua a nih angin an tan sorkar sawiselna leh hmalakna ṭha lo dodalna lam phei chu puan chhuah a rem lo.

Tun hnaia Mizoram sorkarin media mite a namnûl nia ngaih theih thil a thleng ta fo. Sorkar hian IPR hmanga a duh chin a puan chhuah hi a duhtâwk ta viau em ni, tia ngaihtuah theih a ni.

Sorkarin independent media a namnûl a nih chuan, zalen taka mipui ngaihdan siamna leh thlirna hrang hrang aṭanga sorkar hmalakna thlirna leh langtlang sorkar aiin, mahni duh dana mipui rilru hruai tumna lam a hnaih ta tihna a ni ang.

Media nêkchêpna, dah hniamna leh hmuhsitna ram hi ram nuam a ni ngai lo tih hriat reng a ṭha a; uchuak taka duhsak an ngai lo a, a ṭul leh pawimawh chinah erawh chuan duhsak a, an tana remchang siam erawh a ṭul.

Kumin Republic Day-a press mite chunga thil thleng hi a buaipuitute tihsual palh a nih chuan fimkhurna atan an hman ni se. Sorkarin independent media hnawk ti a, sawiselna leh venpuina ngaihtheih lohna rilru lan chhuahna a nih erawh chuan a pawi ang. Media mite leh mipuite kan fimkhur a, thîkthu kan tihchhiat tlan pawh a ngai a ni.