‘Hriselna’ thuchhuah hi

Health department chan-chinbu tihchhuah HRISELNA, November, 2016-a chhuakah chuan phai aṭanga sangha lakluhah Formalin hmuh a nih thu leh, hei hian cancer a thlen theih tur tarlan a ni.

He thuziak hi Health depart-ment-a principal director leh commissioner chuan thuchhuah siama sawifiahin Formalin hi phai aṭanga sangha an endik tawhah mihring tana hlauhawm khawp hmuh a la nih loh thu an tarlang a, mipuite chu chiai lo turin a chah.

He thuziak hi thuziak naran ang mai a ni lo a, Health department tih-chhuah chanchinbu a nih miau avangin mipui an chiai hi a mak lo. Tun hnaiah information technology a ṭhang chak si a, thil hi awlsam takin kan inhrilh darh zung zung a, he thu pawh hi a darh chak hle.

Hei hian nghawng na tak a nei thei a, sangha zuara eizawngtute eizawnna a nghawng thei a ni. HRISELNA chanchinbua a inziah dan tak phei chuan Formalin tih mai duhtawk loin mitthi ṭawih harna hman a nih thu an ziak lang a, chu chu cancer thlen theitu a nih thu an tarlang tel bawk.

He thu hi tun hnaiah Health department hotu lamin an rawn sawifiah zui leh a, hei vang hian a inziak hi a dik tawk lo a nih hmel. Hetihlai hian a sawifiahna hre zui tawh si lo, thu inthawn darh hretu tan chuan sangha ei hi thil hlauhawm, cancer thlentu ang hiala ngaihna a awm lo thei lo a, a pawi hle a ni.

He thil thleng hi tun hnuah fimkhur zuina atan hmang ṭheuh ila, mipui hriata kan puanzar tur chin hi chu uluk taka en a ngai. Information dik tawk lo leh tluantling loin mipui a tihchiai theihzia a lang chiang tawh a, a bikin hriselna khawih thilah kan fimkhur a ṭha khawp mai.