IAF tana ram lak dan chhui a ṭul

Tunlai chu Lengpui leh Sihphira ram eng emaw zat Indian Air Force (IAF) hman tura pek leh zangnadawmna tam lutuk chungchangin sawi a hlawh hle. Mipui nawlpuiin an ngaihven a, an sawi nasa a; political party-te'n inpuhmawhna leh inbeihna atan an hmang mek bawk a, an la hmang zel pawhin a rinawm.

Sorkar document ṭhenkhata a lan dan leh chanchinbua tarlan danin, IAF tana Lengpui leh Sihphira ram lakah hian a vaiin zangnadawmna atan cheng vbc 187.90 pek a ni a; a tam tak zet. Ram lei khawmtu nia sawi Rohmingliana hnenah cheng vbc 70 pek a ni a, a buaipuitu nia sawi Henry Lalremsanga Hlawnmual hnenah cheng cheng vbc 117.90 pek a ni.

Zangnadawmna atan cheng vbc 187 chuang pek a nih thu puanzar a nih aṭangin Mizoram pum titi a tling chho a, political-te pawhin inbeihna remchangah an lo hmang nghal vat bawk. Rorel lai party an kawh rawn deuh niin a lang a, chutih laiin, sorkar hun hmasa lam aṭanga lo inṭan tawha sawi a awm bawk. Hengte avang hian political party an inpuhmawh niin a lang.

Eptu party ṭhenkhat chuan CBI chhuitir an phût tih an sawi chiang tawh a; state sorkara rorel lai party lam pawhin chhui chian an cho viau niin a lang bawk.

Politics-a party dang beihna atan an hmang tawh a, inbeihna atan an la hmang zel ang. Party-te hi chu inbei tura duan an ni a, an duh leh lo inbei zel se. Mipui rilrua rinhlelhna lian tak awm hi chu bawhzui phahna tham a tling a; thil dik lo nia ngaih theih a awm nualin a lang.

Chuvangin, CBI an ni emaw, Lokayukta lam an ni emaw, IAF tana ram lâk leh zangnadawmna chungchang hi mumal tak leh uluk taka chhui chian ni thei se; thil dik lo a awm a nih chuan dan ang taka hmalak zui a ngai ang a, dik lo a awm lo a nih tâk leh a ṭha a ni mai.

IAF tana Lengpui leh Sihphir ram lakah hian dik lo taka thil tih te, dan bawhchhiatna te, inthamnate leh hlemhletna eng eng emaw awm thei a ni a; chu chu mi tam takin an rin rûk dan ni pawhin a lang. Chutih rualin, dan bawhchhiatna leh dik lo taka thil tih a awm miah lo ve thei tho bawk. Chuvangin, kan rin dan hi a dik turah ngai bur lo ila, rinthu sawi chiam chiam lo bawk ila a ṭha ang.