FIR thehluh

MPCC president Lal Than-hawla chuan, Congress Bhavan-ah thu sawiin, MNF-te chu eirukna lam sawi uar turin an infuih nia a hriat thu sawiin Lal Thanhawla chuan, "Eirukna lama an rinthu an sawi ṭhin. An duh chuan an rin thu an sawi hmang hian FIR thehlut se, kan va cho tak em. Kan ram hruaitute hi mipuite hian lepsé ṭhin se, kan ram hruaitute tan a ṭha ang," a ti.

Mizoram chief minister leh Congress hotupa hian eiruk chungchangah fiah a ngam hle mai a, FIR thehlut mai tura a duh thu a sawi ngam. Heti taka a sawi huai avang hian a lawmawm han tih loh rual a ni lo a, chutih rual erawh chuan Mizoramah hian politics kaihhnawiha FIR thehluh hi chuan nghawng a nei tam lo hle tih erawh mipuiin an hre tawh.

Tuna minister-te hian an eiruk leh eiruk loh lam chu lo dahṭha ta ila, politics thilah hi chuan FIR thehluh hian bawhzui a hlawh meuh lo. A khawi lam pawh hi ni se, a nghawng nat dan leh nat loh dan chu mipuiin an hre chiang tawh a, ram hruaitu eirua rinhlelh hi awm mah se FIR thehluh lam ai chuan mipui hmaa tihmualpho tuma beih hian awmzia a nei zawk mah mai thei a, politics zawng phei chuan a hlawk zawk ang.

Sorkar hruaitute hian eikruk kawnga an fihlim thu an sawi rual hian sorkar hmasate an fihlim tawk lohna an sawi ri leh ṭhin a, hei hi chu poli-tics lam thil a nih vangin finfiahna tak tak hmuh theih a ni lo. Minister-te hi lo fihlim vek pawh ni se, thil lang chiang tak erawh chu sorkar official lamah hi chuan an tihṭhan han sim ta emaw, kalphung han danglam ta thut leh han thianghlim ta duak hi sawi tur a la vang hle a ni.

Mipui lam hian ram hruaitute chet dan avanga FIR thehluh hi an ngaihven lutuk loh lam a ni a, political party FIR thehluh lah hi mipuiin ngaih khatah an nei tawh a; ram hruaitute eiruk leh eiruk loh fiahna atana FIR hman tum hi chu tehna tling bera pawm a harsa deuh ang.