'Thlarau MR' thlir liam chi a ni lo

Mizoram sorkar hnuaia 'Thla-rau MR' an tih mai, muster roll-a thawk, mihring awm si lote tihbona tura sorkarin hma a lakna kal zelah, Thlarau MR mi 3,000
aṭanga 5,000 vel nuaibo anga ngaih a ni a; tun dinhmunah MR mi 13,256 an awm. Finance minister Lalsawta chuan thlarau MR tihbo a nih avangin sorkarin kum khatah cheng vaibelchhe 58 vel an a hum theih phah niin a lo sawi tawh a ni.

Mizoram sorkarin pawisa inrenchemna tur leh thil dik lo titawp tura ṭan a lakna hi a fakawm takzet a, heti zat zet mai myster roll dik loa kalpui an titawp thei hi an ti ṭha hle a ni. He thil a lo lan ruala ngaihtuah tel nghal loh theih loh chu ‘thlarau MR’ an tih mai hi ruaitu nei an ni a, tihtawp a nih rual hian a ruaitu chu an hriat nghal mai tur a ni a, heng thil kalpuitu officer-te emaw, tute emaw pawh ni se chhui zui an
ṭha khawp mai.

Mizo mipuiin sorkar kal-phung dik lo kan sawia ‘sorkar’ tia kan sawi hian kan mitthla lamah minister-te emaw, an thawhpuite emaw hi lang lian hmasa ṭhin mah se, sorkar pisaa hnathawktute hi a ‘sorkar lai tak’ tia han sawi theih mai tur khawpa pawimawh an ni. Sorkar official pawimawh chinte aia sorkar-a mi ṭangkai leh thil hre chiang an awm lo, anni hi an dika an fel chuan sorkar pawh hi a kal dik thui thei hle a ni.

Tuna ‘Thlarau MR’ han tih pawh hian a ruaitu lam hi politician aiin sorkar officer-te an nih hmel a, muster roll dik lo chhui chhuaka ban theitute hian dik lo taka heng mite hming lema ruaitu hi an chhui chhuak tel tur a ni. Thil dik lo a awm ngei a ni tih a chiang tawh a, a tidik lotu lam chhui hi chu thil harsa a ni dawn lo a, eirukna a zung nena phoro duhtu sorkar hian, ‘Thlarau MR’ lo kalpuitute hi chhui chhuak se, dan angin hrem ngei rawh se.