Pawikhawihtu chhungte laka chêtna

Tun hnaiah Aizawlah chanchin mawi lo lam, pawikhawihna leh tualthihna hriat tur a awm nual a, Mizo mipuite beng a verh em em a, kan ngaihven tlang a, Mizoram pum titi a tling.

January 26, 2026-ah Aizawlah kut inthlâkna vangin thihna a thleng a, social media lamah video a darh a, pawikhawhtu mipuiin kan dem rawn a, a tuartu kan khawngaih tlang a ni. Tanhril nula thihnaa inhnamhnawih ngeia ngaih police-in an chhui chhuah thu January 27, 2026-ah puanzar a ni a; he tualthihna pawh hi mipuiin kan dem rawn a ni.

Tun hma aṭanga tunlai thlengin pawikhawihna hrang hrangah pawikhawihtu chhungte tawrhtir ve hi Mizoramah a lo awm tawh ṭhin a, inhnawhchhuah a ni fo. Pawikhawihtu chhungte, pawikhawih ve miah lo leh naupang thlengin mipuiin an lo tawrhtir tawh ṭhin.

Tanhril nula thattu ni ngeia ngaih police-in an chhui chhuah thu puan a nih hnu lawkah pawikhawihtu chu thi tawh ni mah se, a chhungkua chu mipuiin an bei zui nghal a; an in hâl a ni a, an in leh veng chhung aṭanga hnawhchhuah an ni.

Mizoram mipuiin Tanhril nula thihna pawi an ti a, a tuartute an khawngaih em em. Tualthattua chhui chhuah tâk nupui fanaute veng chhung aṭanga an hnawtchhuak pawh mipui an la hrethiam viau. Hnawhchhuah an nih avanga an chhuak tur lo tihbuai lehzel erawh mipuiin uchuak an ti ta deuh a, an dem lêt zawk ta niin a lang.

Pawikhawihnaah hian pawikhawihtute chuan an tuar mai tur a ni a, an tawrh theih nan pawh chak tak leh dik taka hmalak a pawimawh. Chutih rualin, pawikhawihtu ni ve lo, inhnamhnawihna pawh nei ve lo an chhungte thlenga tawrhtir tum tlat erawh a dik lo a, chutiang rilru pu tlatte chu mi rilru ṭha an ni bik kher lo ang.

Pawikhawihtu ni lo thlenga tawrhtir tuma hmalakna hi dan loa chêtna a ni deuh zel. Hetiang hi pawikhawihna a thlena mipui hmalak dan a nih zel chuan a rapthlak tial tialin a rinawm. Dan laltir a, dan ang taka chêt aia, mipuiin kan kutah rorelna leh inhremna kan dah a nih chuan kan ram hmabak a thim hle ang. Dan lal lohna ram, mipui duh duh dana chêtna ram hi ram nuam a ni ngai lo tih hriat reng a ṭha e.