Zirna hmasawnna tur ngaih pawimawh

Mizoram Education Reforms Committee thutlukna angin Mizorama high school chin hnuai lam sikul luh hun, academic calendar leh sorkar sikula uniform inang tlang (common uniform) chu thlak a ni dawn.

Kalphung thlak tur pahnih–academic calendar leh common uniform chungchangah hian mipui ngaihdan lak a ni a, rawtna tylentu zinga a tam zawk duh dan angin kalphung thlak a ni dawna sawi a ni. Academic calendar thar January–December 2027-28 session aṭanga hman tura a ni.

Academic calendar chungchangah hian, tuna kal mek dan April–March leh kum 2027 atanga kal dan tur January–December hian thatna leh that lohna an nei ve vein a rinawm a, ngaihdan leh tha tih zawk a inang vek lo.

Mizoram pawn lamah erawh chuan April–March hi academic year kal dan a ni tlangpui. Tun hmain Mizoramah school academic year hi Janaury-December a lo ni tawh a, India ram hmun danga kal dan April–March hi a tha zawka ngaih vang a ni ngei ang a, Mizoramah pawh kum 2013-14 session atangin hman ve a ni. Kum 10 chuang hman a nih hnuah India ram kalphung anga kal hi a tha lo zawkah kan ngai leh ta a ni ang, January–December ah bawk kan let leh dawn ta.

School calendar-ah central board leh state board tam berte kal dan aṭangin an kal loh dana kal tura thutlukna siam a nih chiah laiin, board exam–HSLC leh HSSLC result tihchhuah danah erawh chuan CBSE leh CISCE te kal dan a tha an ti a, chutianga kal ve tura thutlukna siam thar a ni ve leh thung.

Kan duh chinah central leh state dang board-te kal dan ṭha zawkah ka ngai a, thutlukna atana ṭan chhanah kan hmang a; kan duh loh chinah kan entawn duh chuang lo. Hetiang hi kan kal dan a ni a, a bulpui berah chuan kan remchanna leh awlsamna tur kan zawn vang niin a lang.

Kan tana remchang leh awlsam zawn hi thil ṭha lo leh dik lo a ni ngawt lo a, chutih rualin, ram pum huap thlir tel a ṭul a, ram pum huapa kalphung hi kan duh dan loh zawk pawh ni se, kan kal dan tur zawk a nih a rinawm.

School calendar te, etc. chungchangah hian kalphung nghet, dik si kan neih a ṭul. Ministry a inthlak apianga kalphung kan thlak ṭhin a nih chuan a dik thei lo, zirnain a tuar ang a, zirlaite'n an tuar bawk ang. Kalphung mumal leh nghet zawk a awm theih nan sorkar thuneitute'n ngaihtuahna an sên a ngai. Thutlukna siam reng rengah Mizoram zirna a that zawkna tur leh zirlaite hmasawnna tur ngaih pawimawh ber ni zel rawh se.