Ruihhlo dona Operation Jericho

January 24, 2026 khan Chief Minister hoin thuneitute'n Mizorama ruihhlo do dan an thlir lêt a, Operation Jericho hnuaia ruihhlo do zel dan tur an sawiho. CM chuan, ruihhlo chu Mizo hnam hmelma lian ber a nih thu a sawi.

Operation Jericho hi Mizoram sorkara Home department, Excise & Narcotics department leh YMA thawhhona a ni a; September 1, 2025-ah ṭan niin, state pawn aṭanga ruihhlo rawn lut danchah tumna a ni.

Tarlan danin, Operation Jericho kalpui ṭan aṭanga January 13, 2026-in ruihhlo cheng vbc 196.42 hû man a ni tawh. Police bikin September 1, 2025 aṭanga January 19, 2026 chhungin ruihhlo kaihhnawihah mi 185 an man a, thubuai 125 an ziak lut.

Operation Jericho chhung bika Police-te'n ruihhlo an man tamna ber chu Champhai district a ni a, Saitual district-in a dawt a, Aizawl district chu pathumna a ni pha chauh.

Ruihhlo man tamna ber district pahnih hi Myanmar leh Manipur luhka district an ni a; heng aṭang hian ruihhlo a rawn lut nasa tih a chiang. Hei hi hriain sorkar leh YMA ṭangrual pawhin Operation Jericho hmangin khawchhak lam aṭanga ruihhlo rawn lut danchah tumin hma an la mek a ni.

Operation Jericho hnuaia thla 3 chuang hret chhunga ruihhlo man a tam tham hle mai a, ruihhlo donaa thawktu, a bik takin Myanmar ramri hnaih lama awmte'n ṭan an lak nasat vang a ni pakhatin a rinawm. Theihtawp chhuahtute an fakawm a, Mizoram ṭhalaite himna tura thawk an ni.

Ruihhlo dang chat tur hian a rawn luhna district-ahte tun aia na lehzuala hmalak ni se, Operation Jericho hmangin pawh na lehzualin beihpui thlâk ni se. Thâ thlah loa hmalak zui zel a nih chuan, ruihhlo rawn lut pawh a tlem tial tial ngei ang.

January 24-a ṭhutkhawmnaah CM-in, ruihhlo chu hnam hmelma lian ber a nih leh, ruihhlo donaah sorkar leh khawtlang ṭanrual a pawimawh thu a sawi. Ruihhlo donaah ṭanrual a ngai thu hi ram hruaitute leh mi tam takin an sawi tawh a, heng ṭhahnemngaihna au awte hi mipuiin kan bengrawngah kan thun a pawimawh a, kan phâk tâwkah ṭan kan lo lak ve te, hma latu bikte tichak zawnga kan theihna zâwnah kan lo chêt ve a ṭul a ni.