Tourist hip kan tum dan hi

Tourism department chuan October 15, 2016 thleng khan tourist lodge leh highway restaurant 59 an siam tawh zinga pakua chu mimal kutah an hlan (privatise) tawh.

Mizoram hi khualzinte hip thei turin a ram a mawiin a nuam a, khualzin lo kal chhun pawhin nuam an ti viau
ṭhin. Hei vang hian mikhual zawkte hnen aṭangin Mizoram hi khualzinte hip thei tura theihna nei sang tak, khualzin kal tlanga sum ṭha-hnem tak lalut thei dinhmuna ding anga an sawi thu ngaihthlak tur a awm reng ṭhin.

Mikhual zawkin mikhual dang hip thei turah min ngai a, vawi tam tak an sawi kan hre tawh a; nimahsela khualzin hip kawnga kan dinhmun dik tak erawh chu heti mai hi kan ni. Kan hotu lam hian tourist lodge sak hi an hmanhmawh a, a satu tur lam an indaih deuh pawh a ni mai thei a, a tak ramah chuan kan tourist lodge-a thleng tur mikhual ber kan hip leh meuh si lo.

Tun hnaia tourist lodge an privatise chhan lian tak pakhat hi chu a hnathawktute hlawha an sen ral leh a sum lakluh inmil thei lo hi a ni. State ṭhenawmin tourism hi sum lakluhna mai pawh ni lo hausakpui thamin an kalpui a, Mizoramah erawh chuan sum khawhralna ang lek lek a ni mai a, a pawi takzet a ni.

Tun hnaiah tou-rism lamah project lian tak tak sawi rik niin eco tourism lamte pawh kan hawi ṭan dawn niin a lang a, a lawmawm khawp mai. Thil pawimawh tak erawh chu tourism hi kan zuang lut ve rau rau a nih chuan kan theihna leh khualzin kan hip theihna zawn hi thlang fel ila, kil tina luahtu awm mang loa tourist lodge sak chiamte hi kalsanin hlawk thama khualzin hip thei turin ngaihtuahna i seng ang u.