Hunpuiah venghimtu

Aizawl SP chuan krismas leh Kumthar vuakvetah ruahmanna siamin Aizawl khawpuiah police-te duty post tur pathum siam belh a nih tur thu a sawi a; Aizawl bazar chhehvel hmun thumah temporary duty post hi siam a ni ang.

Kum tinin Krismas bazar vanglai hian Aizawl bazarah hian thil bo, rukruk leh harsatna dang thleng hi a tam hle ṭhin a, inveng turin inchah ṭhin mah ila mipui ṭhahnem tak punkhawmna a nih tawh chuan thil hi a kal dan a dik vek thei ṭhin lo.

Hetiang hunpuiah hi chuan venghimtu hi kan mamawh a, puipunna hmuna venghimtu mamawh a nih tluk zet hian hmun fianrial leh zan rei lamahte hian mamawhna a sang ṭhin. Mi tinin hunpui hman tumin mahni phak tawkah inbuatsaihna an kalpui a, rukru leh misual kan tih maite pawhin heng hun tho hi an lo châng ve ṭhin.

Hunpui a hnaih hian rukruk a hluar a, thil bo a tam a, ruihhlo pawh a tam ṭhin. Hei vang tak hian venghimtu mamawhna a sang a, police-ah chauh kan innghah chuan anni tan ven sen a ni lo.

Khaw tin leh veng tinin mahni huam chhung vengtu turin tlawmngai pawl an nei a, hengte hian awmze neia hna an thawh chuan an ṭangkai takzet a ni. Tun hma deuh kha chuan heng mi tlawmngaite hi an pâwng tâl deuh
ṭhin a, dan hriat loh vangte pawh a ni a, an kal fawr deuh changte a awm ṭhin.

Tunah chuan mi kan fing tlang tawh a, khawtlang duty pawhin an tih awm chin an hre thiam a, fimkhur takin dan hnuaiah ṭang-kai takin an thawk ṭhin. Heng mite hi mipuiin hunpuiah hian an mamawh a, police-te chauhin venhim hna an thawk thei lo a, khawtlang mi tlawmngaite an pen chhuah a ṭul tel ṭhin a ni.