Hmar chhak hmahruaitu

Mizoram chief minister chuan tun hnaia Mizo Hnam Rûna a thusawinaah sorkar laipui­in hmarchhak tana sum a dahte hai chhuak turin Mizoramin hma a hruai a ngaih thu a sawi a; bamboo project ṭhenkhatah sorkar laipui lamin a ngaihna an hriat loh thil a awm thu te, bamboo project lama biak tlak bera a ngaih NITI Aayog vice chairman-in thil a hrilhfiah hnua a phûr tâk thu te, India Prime Minister hnena hmar chhak tana pawisa tam zawk dah tura nawr a tum dante a sawi. 

Kan chief minis­ter-in an party mi leh sa kal khawm hmaa a sawi hi a thlamuan­thlak a, Mizoram hian hmabak êng tak a nei niin a lang. Kan sorkarin rua/ mau a buaipui a, chumi kawngah chuan sorkar laipui lam pawh a hrilhfiahtu zawkah a ṭang chho nghal zel niin a lang a, NITI Aayog vice chairman-te hial pawh kan chief minister-in thil a hrilhfiah thu leh, ani hian kan chief minister hi NEC aṭanga sum hmuh dan ngaihtuah tura thurawn a pek bawk avangin sum tam zawk a hai chhuak ngei dawn a nih hmel. 

India sorkarin NEC leh DoNER-a sum a dahte hi hmar chhak state-te'n kan ṭangkaipui rualin sum indaih loh dan en hi chuan hei aia tam zawk sum kan mamawh tih a chiang a. Chumi kawnga India Prime Minis­ter hnena dilna thlen tura hmar chhak chief minister-te thurual­puia a sawm tur hi kan chief minister hi a fakawm khawp mai. Hmar chhak state-te hi sum thawh chhuah sawi tur nei mumal lo kan ni deuh vek a, chu'ng zingah chuan Mizo­ram hi a thawk chhuak tlem leh a puih ngai zual zingah a tel ang. 

Hei vang hian sorkar laipui aṭanga sum hai chhuak thiam, hmar chhak state-a hmahruaitu ni thei hi kan mamawh takzet a; kan chief minister sawi anga sorkar laipuiin hmarchhak tana sum a dahte hai chhuak turin Mizoramin hma a hruai theih chuan a lawmawm khawp ang.