Khualzin phur lirtheite inkara buaina

Tun hnaiah Sairang rêl chawlhhmuna khualzinte phur ṭhin lirthei enkawltute inkarah buaina a awm a, lirthei an indansak tawn hial. Inhriatthiam lohna neite hian thiam zawk nih an inchuh a, thiam zawkah an inngai a, lehlam pawlte chu thiam lo zawkah an puh ve ve a ni.

Sairanga taxi/maxicab-te leh Aizawl taxi (Mizoram Taxi Association)-te inkarah inhriatthiam lohna a thleng hi a zialo hle; mipuiin an dem rawn phah a ni. A chhan ber chu - duhâm vang, huamhauh vang leh mahni hmasial vang niin a lang a; anmahni tan mai ni lo, Mizo hnam angin a zahthlak a, a mualphothlak tel bawk.

Rêl hmanga Mizorama khualzin rawn lut an tam tham a, Aizawl taxi leh Sairang taxi te hian huamhauh lutuk bik loa an inchan sem thiam a ṭul. Khualzinte'n an hman hmasak bik tura indah bik ngawt chi a ni lo. Aizawl lam a ni emaw, Sairang lam a ni emaw, lirthei inang tlang chu awmna bik thliar loin awm tláng se, awm tlang zing aṭang chuan khualzinte'n an duh thlang thei se a ṭha.

Motor hmélhmang aṭang te, a khalhtu awm dan leh hawiher aṭangte hian hman châkawm leh châkawm lo an awm ṭhin. Chutiang chuan khualzinte'n pawisa chawia lirthei an hman turah zalenna leh duh thlan theihna an neih ve a ngai.

Sairanga maxicab/taxi enkawltute leh Aizawl taxi enkawltute an inenfiah ve ve a ngai. Mihring nih chhung chuan mahni hma sial loh theih loh chin a awm a, duhâm miah lo nih pawh a harsa. Mahni hmasial vang leh duhâm vangin mi dangte dâl a, an tan harsatna siam kher loh a ṭha a, mi dang pawhin phurh tur an duh ve a ni tih hre hlawm rawh se.

Khualzin rawn lutte'n sumdawnna lirthei khalhtute hi Mizo an tawn hmasak an ni a, Mizo hmél lanna an ni a, an pawimawh tak zet. Buaina awm loa ngaihngam taka khualzinte'n an hman theih turin an lo awm tur a ni a, hawihhâwmna kawngahte ṭan an lo lak ve a ngai. Tuna neuh neuh ang hi nei tawh lo se, tih hi Mizoram mipui duh dan a ni.

Sairang station-ah hian khualzin phurh inchuh vanga buaina a awm tawh loh nan sorkara a kaihhnawih thuneitute'n awmze nei taka hma an lak a, rem an ruat a ṭul a; lirthei tlân ṭhin pawl hruaitute nen sawihoin, remruatna ṭha tak siam thuai ni rawh se.