Fimkhur la, i nun humhim rawh

Mizoram State Road Safety Council bultumin February 2, 2026 khan Mizoram pumah Road Safety Month hman ṭan a ni a, thupui chu 'Fimkhur la, i nun humhim rawh' tih a ni.

Road Safety Month hawnnaa tarlan danin, kum 2025 chhung khan Mizoramah lirtheia chetsualna 73 a thleng a, thi mi 56 thiin, mi 45 an hliam. India ram pumpuiah lirtheia chetsualna leh thihna a tam a, India rama lirthei chetsualna thleng zinga 70% vel chu lirthei khalh chak vang a ni.

Kum 2025-a Road Safety Month hawnnaa tarlan danin, Mizoramah kum 2019-2023 chhungin lirtheia chetsualna vawi 423 thleng a, chutah chuan mi 355 an thi. Lirtheia chetsualna zinga 68.32% chu fimkhur loh vang niin, chungah chuan mi 253 an thi. Rùi chunga lirthei khalh vanga chetsualna ṭum 85-ah mi 69 an thi bawk.

Statistics aṭang hian, lirtheia chetsualna a thlen lohna tur leh chetsualna vanga thihna a thlen lohna turin chak lutuka lirthei khalh loh te, rui chunga lirthei khalh loh te, dan zâwm chunga lirthei khalh a pawimawhzia a lang.

Mizoramah fimkhur loh vanga lirtheia chetsualna a tam avangin lirthei khalhtute kan fimkhur ṭheuh a ngai. Lirthei khalhtute fimkhur loh leh inthlahdah vanga mi tan takin an thih phah hi a pawi tak zet. Lirthei khalhtute hian kan nunna bakah, mi dang nunna kan kutah a innghat a ni tih hriaa fimkhur lehzuala lirthei kan khalh ṭheuh a ṭul a ni.

Lirthei kaihhnawih dante hi lirthei khalhtute leh mi dangte himna tura siam vek a ni a; lirthei chetsualna leh chumi vanga thihna titlem turin dan zawm mai a pawimawh a, mi tin tih tur a ni.

Mizorama kawngpui tam tak hi a zau tâwk lo a, lirthei khalhtute'n hawihhâwm taka lirthei an khalh a pawimawh. Buaina leh harsatna thleng ṭhin tam tak hi hawihhâwmna hmanga chinfel theih a ni tih kan hriat a ṭha.

Road Safety Month hi lirthei khahtute leh mipuite'n lirtheia himna pawimawhzia te, lirthei khalh fimkhur a ṭulzia te min hriat thartirtu ni se; Month thupui 'Fimkhur la, i nun humhim rawh' tih hi i hre reng ang u.