Zo hnahthlak insuihkhawm

MZP huaihawtin Mizo hnah-thlakte inpumkhatnain Zofest chu Zokhawtharah buatsaih a ni a, Mizoram hmun hrang hrang, India ram state dangte leh India ram pawna Zofate an pungkhawm a ni.

Zofa hmun khata awm ṭhinte chu political boundary an rin hmangin ram pathumah ṭhendarh kan ni a, India ram chhunga chengte pawh state hrang hrangah ṭhen darh kan ni. Hei vang hi a ni ang, hun rei tak chu Mizo leh Mizo pawh kan in mihran hman lek lek a, unau kan ni tih hre reng mah ila kan inhmuh khat avang leh ṭawng a hran avangin unau anga inpawm harsa kan ti.

Tun hnaiah hian Zofa insuihkhawm duhna hi a lian tawlh tawlh niin a lang a, Mizorama chengte mai ni lo Mizoram pawna Zofate pawhin insuihkhawm duhna thinlung hi an pu lian sawt hle niin a ngaih theih. Hei hian chhan tam tak a nei ang a, information technilogy a ṭhat tawh vangin ram hranga mite pawh awlsam zawkin kan inbe pawpin kan hmelte kan inhmu zung zung thei tawh a, kan hun pawimawh hmante pawh TV leh internet kaltlangin kan hmu ve thei ta zel a, hmun hrang daihah awm mah ila Mizo kan nihna kan la vawng nung tlang zel tih kan hre tlang.

Mizoram chhunga chengte, a bikin a khawpuia chengte pawh an harh chho zel a, tun hmaa Zohnahthlak hmun dang aṭanga pemte ngaih theih lohna awm deuh
ṭhin kha zawi zawiin a reh chho mek. Ṭhangthar zawkte’n insuihkhawm duhna thinlung an pu lian ta deuh deuh a, hemi lam hawia programme siam pawh a pung zel.

Kan beisei leh duh ber rorelna khat hnuaia Zofate dah khawm hi tun hnai maiah a thleng lo a nih pawhin, thinlung leh rilruah tal kan insuihkhawm thei a; khawvela hnam anga ding chhuak tur chuan inṭhen darh tham leh inthliar sin tham kan awm lo a, unau kan nihna hre chiangin Zofa kil tina mite’n insuihkhawm dan kawng i dap zel ang u.