Zawhna chhan duh loh

Mizoram rorelna in sang berah eptu MLA pakhat zawhna chu House Leader chuan chhan ṭul a tih loh thu a sawi a, a chhang lo. Hemi avanga lungawi lo nia insawi MNF ṭhalaite chuan Assembly House an pan a, police-te’n lo tidingin hun rei tak chung Aizawl khawpui lirthei che vel a khaihlak phah a ni.

Assembly House-a thil thleng hi poli-tician-te inkar a ni a; politician zingah na tak taka inchhan emaw, kut inthlak tuma intinte leh kut inthlak hialte pawh a thleng ṭhin. Hmun ṭhenkhatah chuan Assembly House chhung tihchhiatte leh tharum thawhna tenau deuhte pawh a chhuak tawh ṭhin.

Tun ṭuma thil thleng hi chu a dan a dang hle mai a, house leader-in member pakhat zawhna a chhang duh lo a, “Ka chhang dawn lo,” a ti hmiah mai. House leader hian a chhanna hmasaah a sawi kim tawhah a inngai a nih hmel a, zawh belhna chhan kher hi a ba tawh loah a inngai a ni ngei ang. Hetihlai hian zawhna chhan sak duh lotu tan chuan he thil hi a na hle ang a, a zahthlak hial bawk ang.

Engpawhnise zawhna a awm chuan chhan ṭhin a ni ngai a, zawhna inchhansak duh loh hi chu in ngaihnepna lam hawi a ni thei a, chin chhunzawm loh a ṭha khawp mai. He thil avanga lungawi lo an awm pawh hi thil âwm tak a nih rualin Assembly House pana pen chhuah hi chu thil ṭul ber a ni lo a, Aizawl mipuite che vel tibuai tur khawpa kawngpui dante pawh hi chin fo loh a ṭha khawp mai.

Mipui aiawha ram rorel tura thlan chhuahte hian zahawm takin rorelna in hi kalpui zel se, zawhna inchhansak duh lohte hi awm tawh lo se a ṭha khawp mai. Chutih rualin Assembly House chhunga thil thleng avanga pawn lama thawm lo neih chiamte leh mipui tibuai thei tura thil tih pawh hi tih tawh loh ni se a ṭha khawp mai.