Sawhthing hralh/lei thuai a ṭul

Mizoram sorkar chuan kumin 2026-a sawhthing lei ṭan hun tura a ruat February 2-ah sawhthing lei ṭan a la ni lo. Agriculture department hotute chuan, sorkarin rate bituk anga lei ngam (buyer) an la awm loh vang niin an sawi.

Sorkarin sawthing lei ṭan hun a tihah lei ṭan ni lo mah se, Agriculture Minister chuan, "Sawhthing leiah kan hmanhmawh vak lo," a ti a; a chíngtute'n kg-ah Rs 50-in an hralh thei ngei dawn a, thlaphânna tur a awm lo niin a sawi. Minister sawi hi tuna hralh duh tawh sawhthing chingtute'n an thlamuan phah ang em, tih erawh ngaihtuah tham tak a ni.

January thla aṭangin khaw eng emaw zatah kut hnathawktute'n sawhthing an cho a, kg-ah Rs 30 velin an hralh a, a man pawh an dawng nghal zela sawi a ni. Sawhthing thartute'n sorkar rate angin an hralh ngei ngei tur a ni tih a awm lo a, sorkarin support price a pek hun nghâk duh lêm loin, hralh thuai an duh avangin man tlâwm zawkin an hralh ta mai niin a lang.

Sawhthing kg-ah Rs 30-a hralh hi a chhe lêm lo a, mahse, sorkarin rate a bituk Rs 50 zatve aia tam hret chauh a ni. Chuti khawpa a man a inthlau a, sum lak luh theih a intam hleih laia tlâwm zawka an hralh duh tlat si hian chhan lian tak a nei. A chhan nia lang chu – sawhthing man dawn an duh nghal vang leh, kumina lo an vah tharah hna thawh tak tak a hunah sawhthing lo hralh zawh hman an duh vang a ni.

Nikumah sorkarin sawhthing tam tham tak a lei a, sawhthing chíngtute pawhin an hlâwkpui hle. Sorkarin a intiamna pakhat a tihlawhtling leh kut hnathawktute'n an thawhrim rah an seng hi a lawmawm. Chutihrualin, sawhthing lei hun chhung a rei lutuk a, ringtharah hna a ṭul viau tawh laiin sawhthing hralh tur buaipui a ngai a, an tan harsatna lian a tling. Sawhthing man pek nghal zel an ni lo a, pek tlâk tak phei chu kum tawp dawn hnaiah a ni daih a; kha pawh kha mi tam tak tan buaina leh harsatna a ni.

Kuminah chuan nikum aia chak zawkin sawhthing lei ni se, a man pawh pek thuai zel ni se a duhawm. Kumina sorkarin sawhthing lei ṭan a tum hunah lei a ni lo a, sorkar chuan chhuanlam a nei a ni. Sorkar chhuanlam hi thil àwm tak a ni mai thei a, chuti chung chuan sorkar hian sawhthing lei vat dan tur a ngaihtuah tur a ni. Tuna ruahmanna an siam hi a fuh tâwk lo a ni thei a, tih dan tur rang taka a ngaihtuah a ngai. Sorkar remchanna leh ṭhat zawkna tur ngaihtuah a ngaih rualin, kut hnathawktute remchânna leh awlsamna te, an ṭhatna turte ngaihtuah tel a ṭul.

Sorkarin kumina sawhthing lei hun chhung tura a ruat May thla tawpah chuan sawhthing lei tur ang ang lei vek a nih theih nan leh, a man pawh nikum aia rang zawka pek a nih theih nan sorkar hian hma la rawh se.