Kohhran inpumkhatna

Mizo Theological Asso-ciation (MTA) chuan thuchhuah siamin, Mizorama kohhran hrang hrangte’n kumin chhûnga inpumkhatna leh thawhhona kawnga hma an lâknate chu lawmawm an tih thu leh, kohhran hruaitute fakawm an tih thu an tarlang.

Mizoram hi kris-tian ram a ni a, Kristian sakhaw betu kohhran hrang hrang tamna ram a ni tel bawk. Mizoram anga kohhran hrang tamna hi a mihring cheng zat aṭanga teh dawn chuan a tam lo mai thei a, heng kohhran hrang tam lutuk hian Mizote chenhonaah pawh harsatna tam tak a thlen tih chu phat rual a ni lo.

Sakhaw biak inang, hnam inang leh ṭawng inang hmang kan ni chunga kohhran hranga kan lawi tak avanga kan inkar boruak chhiat dan en hian, Mizorama harsatna lian tak siamtu chu kohhran hrang tam lutuk hi a ni. Zep thu a cheng lo a, kohhran hrang zingah pawh hian mahni tiatpui deuh hi kan el a, kohhran lian leh lian an inel a, a te leh te deuhte an inbei ni maiin a lang a, inpumkhatna lam chu kan la hlat hle a ni.

Tun ang zela kan kal chuan kohhran inrem lohna avang hian Mizo leh Mizo inkarah pawh khi lian tak a awm thei mai ang tih a hlauhawm hial a, chuvangin kohhran inpumkhatna tura hnathawh hi a ṭul hle a ni. Kohhran hi pawl naran a ni lo kan ti chungin kohhran leh koh-hran inbeih leh inel dan hi chu pawl naran pawhin an tih duh loh tur khawpa an kal nat chang a awm ṭhin a, a pawi khawp mai.

Kohhran inpum-khatna tura pawimawh ber pakhat chu inngaihtlawmna a ni. Kohhran inpumkhatna kawnga ke pen dawn chuan kohhran tinte hi an tlawm ngam a ngai a, chu tlawmna nun chu Kohhran dintu lal Isua Krista zirtirna pawh a ni.