Khawpui himna tura hmalak

Urban Development and Poverty Alleviation (UDPA) department hnuaiah SASCI sum hmangin Mizorama district khawpui hrang hrangah, khawpui himna leh mawina atan Storm Drain Projects kalpui mek a ni a, khawpuia luikawr eng emaw zat him zawk turin siamrem mek a ni.

Storm Drain Projects hi UDPA Minister-in January 8, 2026 khan a tlangzarh a; Aizawl bakah, Mizorama district khawpui hrang hrangah kalpui a ni a, a vaiin cheng vbc 104.28 ruahman a ni.

Tun hnaia UDPA department hotute sawi danin, hmun eng emaw zatah tui luankawr siam mek a ni a, hmun ṭhenkhatah erawh chuan hna thawktu thlan a la ni lo. Hei vang hian hna thawh zawh hun tur pawh a inang lo a, tun ṭhál chhunga thawh zawh tur a awm nual laiin, ṭhenkhat chu nakkum lama zawh turte a ni thung.

Mizoramah leilunga chhiatna hrang hrang a lo thleng tawh ṭhin a, hmun ṭhenkhatah chuan mihring thi leh hliamte an awm ṭhin. Chhiatna thleng zinga ṭhenkhat chu khuarel chhiatna tak tak a nih laiin, ṭhenkhat chu mihring fimkhur loh vangte a ni ṭhin.

Khawpui a ṭhang zel a, khawpuia cheng an tam tial tial a, thlî kan ngah tial tial. Hengte avang hian khawpui a derthâwng tial tial a, chuvangin khawpuia hmun him lo theite him zawka siam chu tihmâkmawh a ni. Tuna awmze nei taka hmalak a nih loh chuan kan khawpuiteah hian chhiatna rapthlak zawk a la thlen a hlauhawm.

Leilunga chhiatna thlen chhan zinga sawi tel fo chu tuichhe paihna leh a luanna mumal siam loh leh luikawr ṭha tawk lo a ni. Heng vanga chhiatna thleng tihtlemna atan leh khawpui him zawkna atana sorkarin khawpui himna tur ngai pawimawha Storm Drain Project a kalpui hi a lawmawm.

Project hian khawpui him zawk min pek si loh chuan awmze nei lo, sorkar sum, mipui sum tam tak sèn thlawnna a ni ang. Chuvangin, Storm Drain Project hi siam a nih chhan ang taka a hlawhtlin theih nan hna thawktute'n rintlak takin hna an thawk tur a ni a, sorkara thuneitute pawhin uluk takin an enpui reng tur a ni.