IAF hnena ram hralh politics

Indian Air Force hnena Lengpui ram leh Sihphir ram hralh/hlan chungchangin sawi a hlawh hle a, political party-te'n party dangte nêk rân chungin hmingṭhat nan hman an tum nasa hle bawk.

IAF hnena ram hralh leh hlan chungchang hi political party-te'n inbeihna atan an hmang nghal chat a; thil dik lo a awm ngei nia an hriat thu an sawi rualin, party dang hotute inhnamhnawih anga ngaih theih turin an sawi hlawm.

Political party-te'n ram hralh chungchang CBI chhuitir an duh hlawm a, CBI-in an chhui theihna tura hmalak erawh an tih turah ngai loin, sorkar hmalakna turah an dah. Sorkar lama hotute lahin CBI hnena FIR thehlut turin eptu party-te an chah bawk.

Ni khat thil thuah thil a inlet thut a, party-te'n hma an la leh ta suau a. MNF-in Chief Vigilance Officer hnenah CBI ko lut tura ngenna an thlen a, Congress party-in CBI-ah FIR an thehlut. Sorkar lai ZPM pawhin FIR thehluh an tum a, mahse, mi dangin an thehluh tho avangin an thehlut ve ta lo.

IAF hnena ram hralh chungchang CBI-in an chhui theihna tura political party-te hmalakna hi a ṭha a, a lawmawm; thil an tih kual vel dan erawh a 'politics' hle a, a nuihzatthlak lek lek.

Tun hmain sorkar sum eirukna/tihchingpenna leh hlemhlêtna tia inpuhnaa awm tawh ṭhin a, thil ṭhenkhatah phei chuan eptu party-te'n sorkar leh sorkar lai party na tak takin an bei ṭhin. Mahse, dan ang taka hmalak leh rorel a nih theihna tura thil ti duh erawh an awm meuh lo a, politics-ah inbeihnaah an duhtâwk zel.

Eptu party-te'n sorkar thil tih danah dik lo a awm nia puangzar chiam a, dan anga hmalak an tum hauh si lo kha mipui tan a ngeiawm thei hial zawk a. Chutiang ni tawh lo a, IAF hnenah ram hralh chungchangah dan ang taka hmalak a nih theihna tura complaint an thehlut ta hi a lawmawm.

Party-te thu thlenah hian state sorkar leh CBI lamin hma an lak zui beisei phawt mai ila. CBI-in an chhui a nih chuan thil nih dan dik tak a lang ang a, thil dik lo ti an awm a nih chuan an chhui chhuak ang a, thu dik kan hre thei ang a, a ṭha hle dawn a ni. Dan anga hmalakna ngaichângin nghâk rih ila, politics-a inbeihna leh hamṭhatna atan hmang tawh rih lo turin insûm deuh tawh ila a duhawm.