CAB duhtu leh duh lotu

Citizenship Ammendment Bill chu Lok Sabha leh Rajya Sabha-ah pass a ni ta. Lok Sabha-ah BJP leh an thawhpui an tam fal avanga hneh taka a tlang hnuah Rajya Sabha lamah pawh a tlang ve leh ta a, tunah chuan act niin dan thar a ni dawn ta.

CAB hi Afghanistan, Bangla­desh leh Pakistan-a sakhaw tlem zawk, Muslim ni lote India khua leh Tui an nih theihna tur dan a ni ber. Hei hi BJP-in kal tlangpui an lo tum tawh ṭhin a, a hlawh­tlin mai loh hnuah kum 2019 Lok Sabha inthlana hnehna an chan hnuah an kal tlangpui thei ta a ni.

BJP-in an duh em em CAB hi Hindu sakhaw zuitu zingah pawh duh lotu tam tak an awm a, Hindu kulmuk pawl anga sawi Shiv Sena chuan rin loh tak maiin Lok Sabha lama an thlawp tawh CAB chu Rajya Sabha-ah chuan an thlawp ta lo. Shiv Shena hian CAB hmanga lo lutte hnena vote theihna (voting right) pek nghal ṭha an ti lo a, Sri Lanka lama Tamil mi Hindu sakhaw betu mi tlem zawkte an lo kir ve dan siamsak an phut tel a ni.

CAB hi hrilhfiah dan, dawn sawn dan leh pawm dan a inang lo thei hle mai a; mipui nawlpui chu sawi loh politician leh political party zingah pawh ṭhenkhatin lawm em ema an dawn laiin a duh lotu lam chuan thinrim takin an sawisel. Prime Minister chuan CAB hi rangkachaka ziah phu hial tur angin sawi mah se, a dotu lam chuan India danpui (constitution) pawng­sualna ang hialin an puh ve thung.

Mizoramah pawh kohhran, tlawmngai pawl leh political party hrang hrangin CAB hi duh loin an do deuh vek a; nimahsela Hmar Chhak an huamtir loh hnuah MNF lam chuan an thlawp leh ta a, kan Lok Sabha MP pawhin a thlawp thu India ram pum hriatah Parliament House-ah a puang ta a ni.

India ram pum hi CAB duh leh a dotuah a inṭhen ta phawk a, Mizoram mipui pawh hi CAB duhtu leh dotu lamah kan inṭhen ta niin a lang.