Pawikhawihna leh 'Justice for'

Mizoramah kum sawm chuang hret kal ta aṭang khan 'justice for' tia hmalakna a awm ṭan a; pawi khawihna leh pawi khawihna nia langah tu emaw, a bikin mi rethei zawk nia langte thlavâng hauhin mi ṭhenkhatin hma an la ṭhin. Mizoram pawn lama mi ṭhenkhatte tih dan kan entawn a nih a rinawm.

'Justice for' tia hmalak hi a ṭul cháng a awm thei a, chutih rualin, ṭul hauh loa hmalak chiamna thlentu a ni thei bawk. Tun hma pawhin Mizoramah 'justice for' tia hmalakna a lo awm tawh ṭhin a; chungah chuan hma latute'n an rin dan leh nia an hriat dan behchhanin hma an la ṭhin a ni.

Chutihrualin, Mizorama 'justice for' tia hmalakna awm tawh zinga eng emaw zat chu hma latute'n nia an hriat leh an rin dan chu a lo dik vek lem lo tih a lang zui a ni. Chung aṭang chuan, thil hi a lan dan ang ngawt a ni lo fo a, social media-a an sawi tam ang hi thil nihna dik tak a ni kher lo tih a lang chiang hle.

Pawikhawihna a thlenin mi tam takin an ngaihtuah zui a, ni theia ngaihte an nei a, rin dante an nei ṭhin. Mahse, thil nihna dik tak erawh kan rin dan leh mipui náwlpui rin dan ang a ni kher lo thei tih erawh hriat reng a pawimawh.

Thu chiang leh finfiahna awm si loa rin dan kalpui vak hi a ṭha lo a, a him lo a, thil ṭha lo zawk thlen phah theihna a ni; fimkhur a ngai a, dik lo zawk thlavâng hauha kan chêt chiam loh nan invên a ṭha. Dan rorelna tibuai lo tura inven fimkhur a ngai.

Pawi khawihnaah a ni emaw, thil dangah emaw pawh ni se, khawngaihthla la ṭhinte leh lainatawm zawkte hi an dik vek kher lo. Chuvangin, mi kan khawngaihna leh lainatna hi dik leh dik lo tehna tur a ni lo a, thutlukna siam nan hman tlak a ni lo.

Mirethei, khawsak harsa zawkte leh hnuaihnung zawkte thlavâng hauh a ṭha a, chutih rualin, an dik lohnaah chuan an thlavâng hauh bik tur a ni lo. Khua leh tui zawng zawngin dikna chanvo inang tlang kan nei. Miretheite'n 'right' an nei ang bawkin mi hausa zawkte pawhin an nei a; mi retheite 'right' atana beihnaah mi hausa zawkte 'right' palzût tur a ni lo.