Kângmei lakah fimkhur zual a hun

Mizoramah Kângmei Vên Hapta (Fire Prevention Week) hman ṭan a ni leh ta a, February 9, 2026 khan Environment, Forest & Climate Change (EFCC) Minister-in a hawng a, February 13, 2026 thleng hman tur a ni.

Kumina Fire Prevention Week thupui chu ‘Nungcha tinrêng chênna leh tui thianghlim min petu ramngawte kângmei lakah veng him rawh’ tih a ni a; kângmei vennaa hma la ṭha zual khuate hnenah lawmman pek tum a nih thu puan a ni.

Mizoramah ṭhál a ni mek a, hun eng emaw ti chhung chu khua a la ro zual zelin a rinawm. Ṭhál laiin kângmei a chhuak duh bik tih kan hre tlang a, chuvangin, hun dang zawng aiin tunah hian kângmei tichhuak lo tura kan fimkhur zual a ngaih hun a ni mek.

Kângmei chhuakin pawi a khawih thui theihzia te, tih a tihchhiat nasat theihzia te kan hria a, nunna hial inchàn theihna a ni tih pawh kan hre chiang. Hengte hi kum hmasa lamah pawh a lo thleng tawh ṭhin. Tunah hian khua a ro tawh êm avangin kângmei tichhuak lo turin chintâwk awm lo khawpa fimkhur a ṭul tawh.

Thingtlang lama in chhunga tapchhak mei hmanga eirawngbawlnaah te, vawk chaw chhumnaah te, ram lama ei-in siamnaah te nasa taka fimkhur a ṭul a; meizûk bung tihlum hmasa loa paih mai mai loh a ṭul. Chenna in a kanin a kan chhanah 'electric kalsual' tiin sawi a ni fo a, hei hi a dik a nih chuan, chhung tinte'n kan in chhung bakah, ran-inah te electric wiring kan enfiah a ṭul tihna a ni.

Sorkarin lo hâl hun hnuhnung a siam a, hei hi lo hâl tur nei zawng zawngin an zawm ngei tur a ni a, meikawng ṭha takin an sial ngei tur a ni bawk.

Kângmei Vên Hapta hi mipuite’n kângmei laka fimkhur nachang an hriat thar lehna tur te, kângmei laka invenna uar lehzuala tihna tura hman a ni. Inkhawm (function) neia Hapta hman ringawt hi a hlawhtlinna a ni lo a, hman a nih chhan ang taka a hlawhtlin theih nan mawhphurhna neite'n theihtawp an chhuah a ngai a; mipui zirtirna atana hmanraw hman theih apiang hmangin theihtawp chhuahin hma la rawh se.