Kut themthiamna lam tihhmasawn

Labour, Employment Skill Development and Entrepreneurship department chuan February 10, 2026 khan Lammualah LESDE Kût an buatsaih ṭan a, a vawi khatna niin, February 14, 2026 thleng neih a ni dawn. Kûtah hian Larsapin Mizoram Building & Other Construction Workers Welfare Board member-te hamṭhatna tur ‘Rahbi Chhertu’ leh ‘Eizawnna Kailawn’ a tlangzarh.

MBOCWWB hi he Building & Other Construction Workers’ (Regulation of Employment & Conditions of Service) Act, 1996’ tlawhchhanin March 20, 2009 khan din a ni a, mi hnuaia in sak leh a kaihhnawih rang hranga thawkte hamṭhatna tura din a ni. Sorkara construction work hrang hranga sum ruahman aṭangin Board-ah bituk zat awmin sum chhùn luh a ni a, sum tling khawmte chu MBOCWWB-a inziak lutte chhawmdawlna atan hman ṭhin a ni.

MBOCWWB din a ni hi a lawmawm a, inziak lut chhungkua eng emaw zat hnenah ṭanpuina leh chhawmdawlna pek a ni tawh a, a ṭha hle. Chutih rualin, inziak lut thei ni si, inziak lut lo an la tama sawi a ni a, inziak lut thei zawng zawng an inziah luh theih nan mipui hriattir kawngah ṭan lak thar zel a pawimawh.

Sorkara construction project tin aṭangin MBOCWWB-ah hian chhiah (cess) chhûn luh a nih avangin sum tling khawm a tam a, an hmang sêng loa sawi a ni ṭhin. Hei hi sum a tam hrim hrim vang a nih theih rualin, a hmanna tur, mipui tana ṭha si ngaihtuah tawk loh vang pawh a ni thei ang.

MBOCWWB-a inziak lut chhungkuaa ṭhalaite'n kut themthiamna lam an zir theihna tura ṭanpuina tur 'Rahbi Chhertu' leh 'Eizawnna Kailawn' siam a ni hi a ṭha hle. A chhawr ṭangkaitu turte'n an chhawr ngei theih nan thawktute'n mipui hriattir leh hrilhfiah kawngah chak taka hma an lak a ṭul ang a; a chhawr ṭangkai theitute pawhin an ngaihven a ṭul bawk ang.

Industry lama deh chhuah hian ram economy a tisang ṭhin. Mizoramah industry lian tak tak bun remchang lo mah se, kut themthiamna hmangin industry tênau tam tak din theih a ni. Chuvangin, kut themthiamna lam hi Mizoram economy tisang thei a nih avangin uar a, chawi lâr a, tihhmasawn a ṭul.

Sorkar hian Mizo ṭhalaite theihna leh thiamna hai chhuaka tihmasawn turin chak lehzualin hma la se; Mizo ṭhalaite pawhin hmasawn tumna rilru púin, thiamna rintlak neih tuma ṭan an lak sauh sauh a ngai a ni.