Thu dik leh rintlak hmanga inbeih ni se

Mizoram Pradesh Congress Committee chuan February 10 khan press release an siam a; Mizoram sorkar chu kawlphetha hman man (electric bill) tipungah an puh.

MPCC-in electric bill pung nasa nia an tarlan hi power tariff tihsan vang ni loin, eng emaw fel lo a awm vang a nih a rinawm. Meter reading dik lo vang te, khawl fel loh vang leh chhan eng eng emaw vanga bill sang ta chiam a awm ṭhin a; hetiang hi mi tam takin an tawng tawh.

Electric bill sang thut ang chi hi chu sorkarin power hman man (tariff) a tihsan vang a ni lo fo. Thil fel lo eng emaw vang a nih tlangpui avangin department-a bawhzui (complaint) chi a ni a, a dik lo lai hmu chhuaka bill hniam leh ta tam tak a awm tawh a ni.

Sorkarin kawlphetha hman man (power tariff) a tihsan leh tihsan loh chu bill-a rate tarlanah a chiang ṭhin. MPCC-in sorkar an phûtna chhan, electric bill sang vak an tarlanah pawh tariff en chian ni se, a chiang maiin a rinawm. Sorkarin electric bill a tisang nia Congress party-in press release meuh siama mipuia an puangzar hi enfiah a ngai a ni.

Tuna sorkarna chelh mektu ZPM party hi kum 5 an sorkar hun chhunga electric bill tihsan lo tiamtu an ni a, he an intiamna hi mipui tan a lawmawm. Congress party-in an press release-a an tarlan anga mipui hriat loha a rûka kawphetha hman man an lo tipung leh si a nih an demawm a; an thutiam chiang takin an bawhchhia tihna a ni ang a, mipuiin an hrethiam lo hle ang.

Chutih rualin, khawl thil leh eng emaw lai fel lo vanga mi tute emaw electric bill sang ta vak la vâwng a, power tariff a tisang miah si lo, tisang anga sorkar an puh a nih erawh chuan, dâwta inpuhna a ni a, mipuiin ngaihdan tâwk an nei thiam ve maiin a rinawm.

Political party-te hi an inbei ṭhin a, eptu party-te hi sorkar khalh nghiltu an ni ṭhin. Party-te hi mi dang an beihna turah fimkhur se, thu dik leh rintlak hmangin inbei ṭhin rawh se.