Kutkawih eizawnnaa chak zawka hmalak

Chief Minister chuan February 12, 2026-a 'Micro & Small Entrepreneurs Excellence Project in Mizoram' leh 'Mizoram Entrepreneurs Development Forum' a hawnnaah, theihna leh thiamthil nei ṭha ṭhalaite sorkarin chawisan a tum thu a sawi.

CM hian, Mizoramin deh chhuah a neih a, hnathawh tur a pun theih nan thiamthil nei ṭhalaite chawi kân an tum thu a sawi pahin, "Kan entrepreneur-te hi an bána kaia din chhuahtir kan duh a, kan flagship scheme Handholding hian an tan remchang a siamsak mek a ni," a ti.

Mizote hi tun hma aṭangin kut themthiamna lamah kan hniam lem lo a, kawng hrang hrangah 'expert' ni pha lo mah ila, kan ti thei zul zel. India rama kut themthiamna lam intihsiakah pawh a che ṭha ber kan ni chho thei a ni. Hengte ngaihtuah hian, mi taima leh tih tak takna nena inzir zui peih tan chuan hlawhtlinpui theih tam tak a awm ang.

Khumtung nula, entrepreneur pakhat, Dairei Banana Chips dintu chu February 10-11, 2026 chhunga Rome, Italy-a International Fund for Agricultural Development (IFAD) Governing Council vawi 49-naah India ram aiawhin a tel a, thu a sawi.

Khawvel huap pawl lian IFAD inkhawmpuia thu sawi phak Mizo nula kan nei hi a lawmawm tak zet a, a chhuanawm hle. Hetihrual hian, ani ang bawka theihna nei ṭha ṭhalai tam tak Mizoramin a nei a; India ram pum huap leh khawvel huap pawha inpholanna hun an la nei zelin a rinawm. Chutiang tur chuan Mizo ṭhalaite'n ṭan la zel rawh se.

Tunah hian Mizoram sorkar chuan Bâna Kaih (Handholding) scheme a kalpui mek a, chutah chuan kut themthiamna leh kutkawih eizawnna lama ṭanpuina (loan) inpekte a tel. Kutkawih eizawnna leh thiamthil hmanga eizawnna hi ram intodelhna leh deh chhuah a punna tura pawimawh a ni a, sorkarin a ngaih pawimawh tak zet a ngai a, kutkawih eizawnna lamah chak lehzuala hma an lak a ṭul.

Thiamna bik nei leh kutkawih eizawnna lam buaipuitute'n ṭan han la sauh sauh zel se; anmahni eizawnna a nih piah lamah, ram eibar nghawng thil ti thei an ni tih an hriat a pawimawh. Hlawhtling nghal mai duhna hi Mizo tam tak hlawhtlin loh fo chhan a ni a, hlawhtling turin tumruhna nen teirei peih a ngai hle tih hriat thar zel a ngai a ni.