Chhungkuaa inzirtir a pawimawh

January 26, 2026 zing khawvar hma khan Aizawl daifémah pawikhawihna runthlak tak mai a thleng a; North Vanlaiphai tlangval kum 27 mi chu Chanmari West tlangval/tlangval kum 19 mi kut tuarin a thi. Pawikhawihtu hi police-in an man nghal a, rang taka police-in an chhui chhuak leh an man nghal kha a lawmawm.

Kut inthlak lai thlalak, CCTV footage chu January 26 vek khan social media-ah a darbh chuai chuai a, Mizoram mipuiin pawi kan ti tlang a, pawikhawihtu kan dem rawn a ni.

Video-a a lan dan chuan, pawikhawihtu khan a duhthu rengin kut a thlak niin a lang a, chutihrualin, tihhlum tuma khawih erawh a ni bik kher lo mai thei. Mahse, tihluihnaa kutthlak ni ngeia a lan avangin police pawhin tualthah thubuai an ziak lut nia sawi a ni. Thinrim thut vanga chet nghal mai pawizia a lang thei àwm e.

Aizawl daifém velah hian intihhlimna (party-na) hmun a awm nual a, chungahte chuan zu pawh an kawl nghal tlangpuia sawi a ni. Chungte chu zu leh ruihhlo dang ti ṭhinte a ko viau a, mi eng emaw zat an kal khawm ṭhina sawi a ni bawk. Chung hmunte chu venhimna lama thuneitute leh dan leh thupek kengkawhtute'n an vil ngun deuh a ngaiin a lang.

Tun hnai deuh, hun eng emaw ti atang khan Aizawl leh Mizoram hmun dang ṭhenkhatah kut inthlak rawn te, aia upa zawkte sual rawn te a hluar leh deuh niin a lang a; a pawi hle. Mizo thalaite hi nasa zawka nun dan phung inzirtir thar a ngai hle.

Mizo nun ze mawi zinga sawi fo leh kan chhuan em em chu aia upa zahna a ni. Mahse, aia upa zahna hi tunlaia Mizo ṭhalaite hian kan tlachham ta hle mai a, nula tlangval la naupang zual deuh leh tleirawlte'n an tlachham lehzual. Aia upa zahna hi chhungkua aṭangin kan inzirtir ṭhat leh a ṭul tak zet a, chhungkua mai bakah, zirna-inahte leh sunday school-ahte nasa lehzuala kan inzirtir a ṭul bawk.