MHIP leh Gutkha do
MHIP General Headquarters chuan February 10, 2026 khan Aizawla veng hrang hrangah vaihlo aṭanga siam zûk leh hmuam (Gutkha product) zawrhna dawrte an fang kual a, Gutkha product zuar tawh lo tura ngenna lehkha an sem.
MHIP-in Gutkha do beihpui an thlak leh ṭanah hian Gen. Hqrs hruaitute chu dawr hrang hrangah kalin, ngenna lehkha an semah hian, Mizo mipuite chu gutkha product hmanga rùn mek an nih thu te, Gutkha product-te'n nasa takin hriselna a tihchhiat thu te, ruihhlo hlauhawm zawk tih ṭanna kawng a nih thute an tarlang. Gutkha product agent liante chu Mizoramah lalut tawh lo tura an ngen bakah, veng tin leh khaw tina dawrte chu zuar tawh lo turin an ngen a ni.
MHIP hian Gutkha lam chi an do chhan chu taksa tana a ṭhat loh em vang a ni. Tun hma aṭangin an lo do tawh ṭhin a, Gutkha an lakkhawmte an lo hâl tawh ṭhin. Gutkha lam chi dona lamah an reh deuh vang vang hnuah tun hnaiah hma an la ṭan leh ta a, a lawmawm a, awmzia nei ngei se a duhawm hle.
Gutkha dona hi MHIP-te hian eng emaw laia tih hluaiah duhtawk mai loin, mar pátin do se. Hma an laknaah innnawr lutuk erawh thil awm ve thei a ni a, fimkhur tak chungin, dan lam ngaihdan tel reng chunga hma an lak a ṭha ang.
Gutkha do hi a ṭha a, a ṭhat lohzia inzirtirna lamah nasa lehzuala hmalak a ṭul. Tleirawl lai aṭanga ti ṭan an tam avangin tleirawl lam tinzâwn deuha hmalak pawh a ṭha viauin a rinawm.
MHIP Gen. Hqrs ringawt chuan awmzia a nei tam lo thei a, MHIP branch-te an chêt ve a ngai a, an chêt theih nan tih tur leh mawhphurhna inpek thiam a pawimawh ang. Branch-te pawhin anmahni huam chhung ṭheuhah theihtawp an chhuah a ṭul bawk ang.
Gutkha a ṭhat loh em em rual hian, vaihlo aṭanga siam thil dang, zûk leh hmuam chi dangte pawh taksa tana ṭha lo vek a ni mai a; hei vang hian MHIP-te hian vaihlo zûk leh hmuamte do tel thei se a duhawm.
Vaihlo aṭanga thil siam chuah reng reng hi a ṭhat loh tlangpui avangin, mipui pawhin ti lo tura rilru siam a pawimawh ber. Chhungkuaah nu leh pa, puitling zawkte'n tu leh fateah ṭan an lak a ngai a, zirna hmun hrang hrangah inzirtir tam a ṭul bawk.