MP kan hmuh dan inang lo

Mizoram Lok Sabha MP C Lalrosanga'n Citizenship (Amendment) Bill (CAB) a thláwp duh loh lantirna atan Mizo Zirlai Pawl (MZP) chuan a lim an hal a; Mizoram Pradesh Congress Committee (MPCC) chuan MNF leh Lok Sabha MP C Lalrosanga chu Hindu lalram dinna atana Mizoram hralhah an puh. Mizo National Front (MNF) party chuan thuchhuah siamin, Mizoram Lok Sabha MP-in CAB a thláwp chu a tih tur dik takah an ngaih thu an tarlang a, CAB-in Mizoram a huam ta lo chu lawmawm an tih thu an sawi. 

CAB duh loh avangin Mizo­rama pawl hrang hrang intel khawm Joint NGO chuan Republic Day boycott an tum tawh a, chief minister ngenna vangin an ṭhulh tawh. Home minister Amit Shah lo zin tur chu pawndum nena hmuah an rel a, an kaltlangpui mai dawna a lan hnuah chief minister ngenna vang bawkin an ṭhulh leh. CAB hi kan duh lo tlang hle tih a lanna chu kan Lok Sabha inthlan dawnah political party hrang hrang leh independent candidate-te pawhin an duh lohzia an aupui a, an do tur thu an sawi ṭheuh a ni. 

Sorkar laipui lamin CAB huam chin tur an tidanglam a, Mizoram leh hmar chhak hmun tam zawk a huam loh tur thu an sawi tak hnuah Mizoram MP chuan CAB a thlawp thu a puang ta. Hei hi Mizo mipuiin an duh loin an dem a, Mizoram chhung leh pawna zirlai pawlte'n nasa takin an sawisel a, an au chhuak a, social media lamah pawh MP thutlukna hian dem a hlawh hle. Hetihlai hian MNF party chuan thuchhuah siam meuhin MP-in CAB a thlawp ta thut chu 'a tih tur dik tak' an tihsak a, MNF lam chuan Mizoram mipui pawh an lâwm tura an ngaih thu an tarlang. 

Kan Lok Sabha MP-in CAB a thlawp chungchangah hian ngaihdan a inang lo hle mai. Sawi­selna, sawichhiatna, deusawh­na ang hial leh thinrim tih hriat tak tak thuziaka umzuitu tam tak an awm laiin MNF lam erawh chuan 'a tih tur dik tak' ti-ah an pawm thung a; Mizoram Lok Sabha MP thutlukna siamah hian Mzoram mipui ngaihdan hi zau takah a inṭhen phawk a ni ber mai.