UPSC exam–nasa lehzuala beih a ngai

Mizoram Home Minister chuan tun hnai khan MSU silver jubilee lawmnaah, Mizoram aṭangin kum 10 chuang IAS-a inziak tling leh kum 30 chhung IPS-a inziak tling an awm tawh loh thu a sawi a; Mizoram chhung ringawt ngaihtuah lo a UPSC exam lam ngaihtuah tur leh, mahni leh chhungte bakah, ram leh hnam tan huaisena tumruh thar leh turin Mizo ṭhalaite a chah.

Home Minister thusawi hi kan ram leh hnam hmasawn zel nan leh Mizo taka a din khawchhuah theih a pawimawh hle. Mizoram chauh ni lo, India ram pum huapa thawk tlâk leh thawk thei tura tumruhna leh huaisenna neih a pawimawh tak zet.

Mizo zingah UPSC direct recruitment hmanga tling IAS, IPS leh IFS an tlem tawh hle; central service dang pawh an tlem tawh. Mizoram sorkara IAS officer thawk mek zingah direct recruitment-a tling an awm tawh lo a, Mizo IAS officer awmte pawh state service aṭanga lut vek an nia sawi a ni. Hei hian ngaihtuah a tithui hle.

Mizoram aṭangin direct-a all India service-a tling an awm loh zel chuan Mizoram sorkar hotu lu ber berte leh, district administration-a hotu lú – DC leh SP te hi hnam dang an ni chho zel dawn a, tunah pawh a ni ṭan mek. Mipui tan ṭawng leh thil dang dangah harsatna awm ṭhin mah se, Mizo dah tur an awm mang tawh si lo a ni.

Hnam dang officer lian an rawn awm hi a ṭha lo ngawt lo a, hnathawhnaah an ṭha tlangpui a, Mizo officer tam tak aia taima leh hna thiam an ni hial ang. Mahse, Mizo mipui náwlpui tan thil hrang hrangah a buaithlak ve fo.

All India service office-a Mizo an tlem tâk em avanga mipui, lehkha thiam lo leh kalhmang hre lo zawkte harsatna hi ṭhalai, lehkhathiam tak takte hian an ngaimawh a hun tak zet a, chonaah an ngaih a ṭul.

Kan ram leh hnam kal zel turah mahni ram chhunga zalen leh ralmuang taka awm mai hi a him lo thei. Ṭhalai lehkhathiam tak takte hian ram leh hnam rilru púa Mizoram páwn lama awm peih tura rilru an siam a ngai. Nu leh pate pawhin rilru ram leh hnam tan ngaihtuahna an sèn a, UPSC exam hmachawn ngam tur leh paltlang thei tura an fate an fuih nasat lehzual a, hma an lâkpui a ṭul.

Mizo ṭhalaite all India service leh central service-ah an tlin theih nan Mizoram sorkarin nasa takin hma a la a, sum tam tak a séng tawh. Sorkar insensona hi ṭhalaite hian a taka an tihhlawhtlin ve a ngai. Ṭhalai eng emaw zatin UPSC exam an bei ṭhin ngei a, mahse, an beihnate a la tâwk zo lo tih a chiang a, nasa lehzuala an beih a ngai a ni.

Mizo ṭhalaite UPSC direct recruitment-a an tlin hleih theih loh chhan hi sorkar pawhin uluk zawka a ngaihtuah a, a zawn chhuah a ṭha a; chumi aṭang chuan hma thar lak a ṭul ang.