MLA-te'n session-ah theihtawp chhuah se

Mizoram State Legislative Assembly pakuanaa ṭhutkhawm (session) vawi rukna chu February 17, 2026 khan ṭan a ni ta a, March 16, 2026 thleng neih a ni dawn. Session ṭan ní-ah hian MLA-te an tel kim a, kan MLA-te an dam ṭha tlang tih a hriat a, a lawmawm.

Tun ṭuma Assembly session hi budget session a ni nghal a, a ṭan ní-ah hian Larsap Gen. Dr Vijay Kumar Singh-a'n thu a sawi a; Mizoram Legislative Assembly chu rorel danah te, thil sawihona leh thu khel danah te, inhnial danah te chhuanawm a tih thu sawiin, chungte chu chhawm nung zel turin MLA-te a chah a ni.

Larsapin a sawi angin, Mizoram Assembly House hi India ramah legislator-te rorel dan felfai tia sawi a ni ṭhin a; a lawmawm. Tun ṭum session-ah pawh hian House member-te'n Zo nun ze mawi ze chi hrang hrang lan chhuahtir se, ṭawngkam hmang uluk se la, anmahni leh House zahawmna vawng nung chhunzawm zel rawh se.

Mizoram Assembly House rorel a felfai kan tih hian thil zawng zawnga felfai vek tihna erawh a ni lo; a felfai vek bik lo a, Parliament House leh state dang assembly house-a rorel dan ngaihtuahin a felfai hle tih a ni. House member-te'n hmasawnna tur leh inzirna tur tam tak an la nei ang a, hmasawn tumna tak tak thinlung nen taima taka an inzir peih a ngai.

MLA-te hi political party hrang an nih angin ngaihdan leh tum dan hrang nei an ni. Anmahni leh an party hamṭhatna tur zawng ràn reng leh khingpui party leh MLA-te tihmualpho theihna tur melh ngar ngar an ni. Chuvangin, inhnial loh theih a ni lo a, ṭawngkam ná leh hriam tak pawh hman a ṭul chang a awm thei; hei hi mipui pawhin kan hriatthiam a ngai. Chutihrualin, MLA-te hian ṭawngkam mawi leh hawihhâwm hmang hram hram thei se a duhawm.

MLA-te'n taima takin rorel se, eng thil (subject) pawh ngaihven peih se, rorel laia muthlu mai mai loin, harhvâng takin House chhungah an awm kar reng a ngai. Tun ṭum session hi a ṭha zawnga Mizoram tana hriat reng tlak a nih theih nan MLA zawng zawngin theihtawp chhuah rawh se.

Mipui lam pawhin kan ram (state) rorelna sang bera Mizoram mipui aiawha kan ram hruaitute'n ro an rel lai hi kan ngaihven a ṭha. Minister-te leh MLA-te nihna leh chêt dan hriatna remchang a ni a, ram hruaitu ṭha leh ṭha lo tehna pakhat a ni tel bawk tih hriain, mipuite'n budget session-ah hian veng kan chhit a ṭha e.