Zirtirtu tling lote chungchang chhui vat ni se
February 12, 2026 khan School Education Department officer-te chuan Education Minister hoin Secretariat Conference Hall-ah review meeting an nei. Ṭhutkhawmah hian zirtirtute zingah marksheet leh certificate nei felfai lo an awm thu tarlan a ni a, chu'ngte chu chhui zui a, a ṭul anga hmalak an rêl.
Felfai lo tih hian eng chiah nge tih, mipui tan hriat theih a ni lo a, educational document lem hmang an awm te pawh a ni mai thei a, thil dang dik lote pawh a ni thei bawk. Engpawhnise, zirtirtu zingah thil dik lo ti, dik lo taka zirtirtu hna thawk an awm tihna a ni.
Zirtirtu zingah thil dik lo ti a, marksheet leh certificate dik lo hmanga sorkara zirtirtu hna thawk an awm nia sawi hi a zialo hle; a zahthlak a, mipui hriata puanzar an nih phei chuan a zahthlak hle ang. Sorkara thuneitute lamah induhsakna vanga thurualpuitu, thuneihna hmang sual an awm a ni thei bawk a; department tan leh hotute tan a mualphothlak bawk.
School Education department-a zirtirtu zingah marksheet leh certificate dik lo hmang an awm tih Minister hoa ṭhutkhawmah sawi chhuah a ni tawh a, chhui zui tura dah a ni. Ṭhukhawma an rel ang hian, document diklo hmanga zirtirtu hna thawk an awm a nih chuan chhui chhuah ngei ni se, dan ang taka hmalak ni se, dan angin hremna pawh lek ngei ni rawh se.
Hetihlai hian MSU hruaitute chuan tun hnaiah Education Minister hmuin, Mizoram sorkar college-a thawk zirtirtu qualify lote chu an hun pawtsei tawh lo turin an ngen. MSU hian kum hmasa lamah pawh hma an lo la tawh a, mahse, sorkarin thiamnaa tling lo college zirtirtute a la chhawr zui zel.
Dan loa thil tite lakah dan lekkawh a nih loh hian sual kan vulh lian tial tial tihna a ni a, hun a kal zel a, mipui rilruah sual tih pawi tih lohna a lian tial tial ṭhin. Sorkar sikula zirtirtu, document dik lo hmangte leh college zirtirtu ni tura tling lo chunga zirtirtu ni theite hi bàn ni ta se, an tan chuan a na viau mai thei a; an khawngaihthlak viau bawkin a rinawm. Mahse, kan ramah dan a lal a, dikna a dinchan theih nan dan anga kal mai hi a ṭha a ni.