State Day ngaihlu zel ila

Nimin February 20 kha Mizoramin state nihna (statehood) a neih champha, State Day a ni a, Mizorama district hrang hrangah hman niin, State Day of Prayer tiin hun hman a ni. State Day hma ní-ah Larsapin State Day thuchah a tichhuak bawk.

State Day hi kum dangah pawh hman a lo ni tawh ṭhin a, chutihrualin, hman mumal loh kum pawh a awm fo mai. Hun kal tawhah sorkar ber pawhin a hman loh kum, inkhawm tê tham deuh tal pawh awm miah loh kum a awm tawh ṭhin a, pisa leh zirna-in chawlh ringawtah an duhtâwk mai ṭhin niin a lang.

Mizoram hi India rama state pakhat a nih ve tâk chungchangah hian a bikin rual ú deuhah chuan ngaihdan a inang lo thei ang. Mi tam takin India laka inlak hran a, mahnia rorelna hranpa neih tuma independence an sual lai a, India rama state pakhat nih mai chu duhkhawp lo mi eng emaw zat an awm thei a; independence sual mah ila, India rama state pakhat nih hi a ṭha tâwk viaua ngai mi tam tak an awm bawkin a rinawm.

Tun hma lam thlir chuan, Mizoram hi India ram a ni ngai lo a, mahse, tunah chuan nghet takin India ram state pakhat a ni tawh a, India laka tâl chhuah mai mai chi a ni tawh lo. Chuvangin, India rama state pakhat kan ni hi Mizo hnam tan a ṭha tawk viauah ngai mai ila a ṭha.

India rama state kan nih avangin hmasawnna tam takin Mizoram leh Mizo hnamin kan neih phah a ni. Chuvangin, State Day pawh hian mumal zawk leh pui zawka hman a phú a, tunah ṭha tak leh mumal taka hman a ni ta hi a lawmawm.

Kum 2024 aṭangin kum tin State Day-ah State Day of Prayer hman a ni a, a lawmawm. Chutihlaiin, political party ṭhenkhat chuan politics-a inchirhtheh nan an hmang niin a lang; a zialo hle. Kristiante tana ralthuam ṭha ber chu ṭawngṭai leh Bible chhiar a ni a; a huhoa Pathian pàwlna remchang atana State Day hman ṭhin a ni hi a ṭha. Mahni lan mawina atan chauha lo ti ve mai mai an awm a nih pawhin, mi tam takin tihtakzetin an ti a, thinlung chhungril tak aṭangin Pathian an au a ni tih hria ila; lo intilungngai lo ila, sawisel phah nan hmang lo ila a ṭha àwm e.

Mizorama roreltu political party azirin sorkarin State Day a ngaih pawimawh dan a inang lo niin a lang. State Day hi rorel lai party avanga hlua hlu lo a nih loh avangin, hun kal zelah eng party pawh sorkar se, State Day hi mumal tak leh a pui thar ang bera lawm zel ni rawh se.