MUHCS leh mimal damdawi-in

Health & Family Welfare Minister chuan Assembly session neih mekah February 19 khan zawhna a chháng a; Mizorama private hospital liante'n Mizoram Universal Healthcare Scheme (MUHCS) an zawm theih loh chhan chu an (private hospital) rate a san vang a nih thu a sawi.

Health Minister chuan, Mizorama private hospital liante rate chu Mizoram pawna MUHCS empanelled hospital tam tak aiin a to zawk niin a sawi a; private hospital-te'n package rate an siam ṭha mek a, chumi hnuah an indawr leh dawn niin a sawi a ni.

April 2025 aṭanga MUHCS kalpui ṭan a nih aṭangin Mizorama private hospital-te'n an zawm ve theih loh avangin neuh neuh a tam hle a; mi ṭhenkhatin sorkar an dem a, ṭhenkhatin private hospital-te an dem thung.

MUHCS hi a ṭha em em a, India rama sorkar healthcare scheme ṭha ber a ni hial mai thei a, mipui pawhin ṭha an ti tlangpuiin a hriat. Mi ṭhenkhat phei chuan, a ṭha mah mah a, sorkar hian sum lamah a la tlakchhiat phah a hlauhawm, ti zawnga sawite pawh an awm ṭhin. Hetiang taka healthcare scheme ṭha sorkarin mipuite a hmantir hi a lawmawm hle.

Sorkar kum thar, 2026-27 chhunga MUHCS kalpui turin sorkar a inbuatsaih leh ṭan tawh a, a lawmawm. Sorkar kum thar aṭang hi chu Mizorama mimal damdawi-in kan neih ṭhat ber berte hian MUHCS zawm thei tawh se a duhawm hle; an zawm a nih chuan a chhawrtu tur chu mipui an ni.

Private hospital-te'n MUHCS an zawm theih loh chhan lian bera sawi ṭhin chu cashless a ni a, cashless a nih hian sorkarin damdawi-in hnenah bill a pe ṭha thawkhat viau niin a lang. Chhuanlama 'cashless' ṭanhmun a phet deuh nge ni, tuna chhuanlam lian tak chu 'rate' a ni leh ta.

Tuna harsatna ber 'rate' chungchangah hian sorkar leh mimal damdawi-in lamte indawr zui zel se, an ṭanna leh dinnaah ṭang nghet bur loin, a ṭul angin tawlh hret thei ve ve se a duhawm. A ṭhenah sorkar a tawlh ang a, a ṭhenah mimal damdawi-in lam an inhnûk hniam ve bawk se; an tawlh hret theih ve ve chuan inremna a awm thei ngeiin a rinawm.