Dan loa damdawi hralh tihtawp a ṭul

Central YMA hnuaia ruihhlo dotu, Central Anti Drugs Squad chuan tun hnaiah Aizawla damdawi dawr neitu pahnih chu dan bawhchhiaa damdawi an hralh lai nangchingin an man a, Excise & Narcotics department hnenah an hlan.

Damdawi zuartute'n ruihna atana hman theih damdawi dan loa a hlawma an hralh hi a pawi hle. A pawizia leh Mizo ṭhalaite nun tichhetu a nih dan hre reng chunga dan loa thil ti an ni a, an huatthlala hle a ni. Chuvangin, an lakah dan ang taka hmalak a ṭul.

Dan loa damdawi hralhtu an man chhuah hi dawr pahnih an ni mai a, dan loa damdawi hralh ṭhin dawr dang eng emaw zat an awm mai thei. Mizorama damdawi zuar zingah dan loa Myanmar lama thawn chho ṭhin an tam thu leh, chu chu an hausak chak chhan ber a nih thu sawi a awm tawh ṭhin. Damdawi zuarte hi thuneitute'n awmze nei takin ûm zui se, dan loa thil an tih leh tih loh ngun takin vil rawh se.

Damdawi zuartute'n rilru dik an put a pawimawh. Damdawi hi túr hlauhawm tak a ni thei tih an hria a, miin an hmansual dan pawh an hre chiang. Hlâwk duh luat vanga dan loa damdawi hralh lo tura rilru an siam a ṭul a; ram leh hnam hmelma ni lo turin fimkhur mawlh teh se.

Dan loa damdawi hralhtute CADS hoin an man chhuak hi a lawmawm - ram leh hnam tan hna ropui tak an thawk a ni. CADS hian tun hma pawhin ruihhlo doin ram leh hnam tan hna ṭha tak an lo thawk tawh ṭhin. Hma an laknaah han dài pelh deuh cháng an nei thei a, chumi vanga mualpho theih a ni.

CADS member-te hi ruihhlo donaah dai pelh lo tura an fimkhur a ngai a, dan hnuaiah zel an chêt a pawimawh. Sorkara mawhphurtute an thawhpui thiam a ṭha a; dan ngai pawimawh chungin, ram leh hnam him nan theihtawp han chhuah zel teh se.