Airport-a thu inchuh

Chief minister Zoramthanga chuan Lengpui Airport chu Indian Air Force (IAF) kuta hlan tumna a awm ṭhin thu sawiin MNF an sorkar chhung chuan an hlan dawn lo tih a sawi a, Airport Authority of India (AII) khawl chu Congress sorkar hunlaiin Hmunpuiah an dah tuiek hman ṭep tih a sawi bawk. Chief minister hlui Lal Thanhawla chuan hei hi chhângin IAF hnena airport hlan tumna an neih loh thu a sawi a, Hmunpui tlanga khawl chu a chuha an chuh avanga an chan theih chauh a nih thu leh, a taka hmang turin a panna kawngpui sial hna an sorkar tawp lama an thawh hman thu a sawi.

Tun hnaiah Imphal Airport chu interna­tional airport-ah tihchangtlun a ni tawh a, ram dangah thlawh­theihna an thlawk chhuak tawh a; Tripura khawpui Agartala-a Maharaja Bir Bikram Airport pawh international airport-a siam hna kalpui mek a ni bawk. India hmar chhaka airport lian ber Guwahati-a Lokpriya Gopinath Bordoloi Airport chu hun rei tak international airport ni tawhin India rama airport lûn zinga mi a ni phak.

State dangte airport hi kan el phak chi pawh an ni lo a, mipui tam dan aṭanga chhutin India hmar chhak bialah hian airport lûn tak nei thei kan ni lo a, international airport phei chu tun hnaiah kan la nei lawk dawn loin a lang. Hetihlai hian kan airport neih chhun hi a nihna ang ang hian chei hnûm ila, faina leh thiang­hlimna kawngah vawng fel ila, ṭhutna nuam leh sik leh sa chungchangah pawh nuam ve deuh taka siam ni se a ṭha tawk hle awm e. 

Ngaihtuahna tithui erawh chu hei chen kan state enkawl tawhtu chief minister ni tawhte thu inchuh hi a ni. State dangin airport-a thawk ṭha zawk nih an inchuh thamw hriat a nih lohlaiin airport ṭha tak an lo nei tawh hlawm a; harsa taka kan sual chhuah kan airport chei hnûm leh tihfai kawngah tal hian ṭan la tlang se a lawmawm ngawt ang.