Mizorama hnam dang endik

MZP leh an thawhpui zirlai pawl hruaitute'n February 21, 2026 khan Aizawlah hnam dang, ILP nei lo leh nei felfai lo mi 90 an man a, police hnenah an hlan. MZP hruaitute chuan February 23, 2026 khan press conference an nei a; ILP-ah khauh lehzual turin Mizoram sorkar an ngen a, dan loa Mizorama hnam dang awmte thlavâng hauh lo turin Mizo mipui an ngen bawk.

Sairang thlengin rêl a rawn luh tawh avangin hnam dang rawn lut an tam zual a, ILP-ah fimkhur lehzual a ngai tih kan hre tlang. Fimkhur lehzual a ṭulna lai tak hi a taka bawhzui a ngai.

Tunah hian ILP neia Mizorama awm mek hnam dang tam tak an awm a, ILP nei lêm lo leh dan loa awm ru eng emaw zat an awm mai thei bawk. Hnam dang, ILP neite engtin nge an awm zui zel tih hriat zui te, permit-in a phal chin bawhpelin an awm em tihte hi vil zui a pawimawh. Temporary ILP phei chu ni sarih chauh dam a nih avangin, en zui ṭhat a pawimawh lehzual.

Hnam dangte leh ILP neite vil zui tur hian kalphung mumal zawk leh changkang zawk neih a hun tawh a, technology hman ṭangkai a hun viau tawh a ni. Mizote hi khawtlang huapa thil tiho ṭhang, inrêlbâwlna nei ṭha kan ni a, hei hi hnam dang leh ILP vil zuina atan pawh hman ṭangkai thiam a pawimawh.

Khaw tin leh veng tinah khawtlang hruaitu – VC leh LC te, khawtlang hruaitu YMA, MTP, YLA, etc. hi an ṭangkai em em. Anni hian mahni huam chhung ṭheuha hnam dangte vil ngun lehzual thei se, dan ang taka Mizorama awm an nih leh nih loh te, ILP nung nei an nih leh nih lohte lo endik ṭhin se, awmzia a nei hle ang. ILP chungchangah khawtlang hotute hi sorkarin mawh-phurhna a pek a, a hman ṭangkai thiam a ngai a ni.

ILP chungchangah hian sorkar hian a nihna ang takin dan a lekkawh a ṭul a; Mizorama hnam dang awmte hi dan ang taka awm an nih leh nih loh sorkara thuneitute'n an endik fo a ṭul. Sorkara mawhphurtute an chêt loh chuan, mawhphurhna leh thuneihna nei miah lote dan lo vêka an chêt a ngai ṭhin.