Hnam dang pasala neih leh Mizona

Mizo inneih, inṭhen leh rokhawmna dan siamṭhatna, 'The Mizo Marriage and Inheritance of Property (Amenment) Bill, 2026' chu February 24, 2026 khan Assembly session-ah pawm a ni. Law & Judicial enkawltu Chief Minister-in a put luh a ni a, MLA-te'n lungrual takin an pawm.

The Mizo Marriage and Inheritance of Property (Amenment) Bill, 2026 hian a principal act ai chuan Mizo hmeichhiate a humhalh ṭha zawkin a lang a; dan hnuaiah Mizo hmeichhiate hamṭhat lehzualna tur a awm hi a lawmawm.

Dan siamṭhat hi Mizo hmeichhiate tan ṭha thawkhat viau mah se, mi ṭhenkhat duhkhawp a la ni lo mai thei a, duhthusam a ni lo mai thei. Duhthusama ṭha a ni lo a nih pawhin, a ṭha thawkhatah ngai thei ila a duhawm; thil rêng rêng hi duhthusam ang diak diakin a kal thei lo tih hriat a ṭha.

The Mizo Marriage and Inheritance of Property (Amenment) Bill, 2026 hian mipui sawi zui a hlawh viau. Mizo hmeichhiain pasalah hnam dang a neih chuan Mizo a nihna a bo dawn anga sawi a awm vang a ni a; hei hi mi tam takin a dik loah an ngai a, an helh a ni.

Dan siamṭhatna (amendment) copy en chuan, Mizo hmeichhiain hnam dang pasala a neih avanga Mizo a nihna a bo dawn thu hmuh tur a awm lo; mahse, sawi zuinaah Mizo nihna bo tur anga sawi a ni tlat si. Bill pu luttu CM-in Assembly House-ah a sawi avang leh, CM sawi anga media-te'n an puan vang niin a lang.

Chief Minister-in, "Kan hmeichhiate'n hnam dang an neih khan an Mizona a tawp tawh dawn a ni. An fate'n tribal an nihna te an claim thei tawh lo ang a, kan dan hnuaiah hian an awm tawh dawn lo tihna a ni," tiin a sawi.

Mithamte sawi danin, Mizo hmeichhiain pasal atan hnam dang a neih avangin Mizo a nihna a bo ngawt thei lo. Mizo hmeichhiate Mizona hi an pasalah a innghat lo a, an pianna leh thisenah a innghat zawk. Mizoa an pian miau chuan thisenah Mizo an ni tawh a, danin a paihsak thei lo.

CM-in a sawi fuh tâwk lo a, media ṭhenkhatin an ziah dan pawh a fuh tawk lo. Hengte hi thusawi leh ziakah fimkhur a ngai hle tih min hriat thartirtu ni se a ṭha ang.