Aikal lâk tihtawp rah chhuah

Department of Personnel and Administrative Reforms (DPAR) Minister chuan February 24, 2026 khan Assembly session-ah, Mizoram sorkarin sorkar hnathawk aikal la mi 37 a hrem tawh thu leh, hrem zinga mi 29 chu an hna aṭanga chawlhtir an nih thu a puang.

DPAR Minister hian, sorkar department chhunga aikal la an awm leh awm loh chu secretary, head of department leh controlling authority-te mawhphurhna a nih thu leh, mawhphurtute'n report dik tak an pek a ngaih thu a sawi a ni.

Hun kal tawhah sorkar hnathawk zinga tam takin aikal an la a; aikal lak hi mi tam takin ngaimawh mah se, titawp ngam emaw, tihtawp tuma awmze neia hma la emaw an awm ngai lo. Tuna sorkarna chelhtute'n an sorkar tirh aṭangin aikal lak tihtawp tumin hma an la a, tunah chuan a reh thawkhat tawh niin a hriat a; a lawmawm tak zet.

Mi ṭhenkhatin an huat theihna thil pawh ni se, sorkar hi huaisen taka thil dikah a kal ngam phawt chuan mipuiin ṭha takin an thlawp ṭhin a; aikal lâk tihtawp chungchangah pawh mipui nawlpui leh, sorkar hnathawkte ngei pawhin sorkar hmalakna an thlâwp a, ṭha an ti hle niin a lang.

Sorkarin sorkar hnathawk aikal la mi 37 a hrem tawhte hi sorkar dan leh thupek zâwm duh loa aikal la luite an nih a rinawm. Dan leh thupek zâwm lote chunga sorkarin huaisen taka hremna a lek ngam hi a ṭha hle. Aikal lak hi thil dik lo tawp a nih avangin, huaisen taka sorkar hmalaknain rah ṭha a chhuah mek a ni.

Aikal lâk phal loh chungchangah hian sorkar hi khawng takin kal zel se, aikal la lui an lo la awm palh a nih chuan huaisen takin action la zel rawh se. Chutih rualin, harsatna khirh bik nei an awm ve thei a, chutiangah chuan hremna lek nghal mai loin, kawng zawnpui thiam a ṭha ang.

Sorkar hotute'n department tin leh pisa tina sorkar hnathawkte dinhmun an hre chiang vek lo a, hre chiangtu tak tak chu department leh pisa tina hotute an ni. Aikal lâk titawp tur hian department/pisa hotute an pawimawh em em a, sorkar hmalakna an thlâwp ṭul a, ṭha taka an bawhzui a ngai a ni.