YMA, CADS, ZADS leh ruihhlo do

Central YMA chuan ruihhlo donaa hma la tur bik Central Anti Drug Squad (CADS) a nei a, hun eng emaw chen a kalpui tawh. Aizawl khawpui hlawm hrang hranga ṭhen a, chan insema ruihhlo donaa hmalakna turin tun hnaiah Zone Anti Drug Squad (ZADS) a din thar a, hma an la ṭan tawh.

YMA hian nikuma an inkhawmpui lianah khan kum 2026 kumpuan atan 'Ruihhlo do' an thlang. Kumpuan hi CYMA chuan an hawng tawh a, YMA branch hrang hrangte'n a hawnna hun an hmang chho mek zel bawk.

YMA-in kumpuan atana 'Ruihhlo do' a hmang leh, ruihhlo do tura hma an lak chhoh dan en hian, tih tak zeta ruihhlo do an tum a, ruihhlo bâwiha táng mekte chhan chhuah leh ruihhlo la ti ve lote veng turin theihtawp chhuah an tum tih a lang. YMA inpekna leh hmalakna hi a lawmawm tak zet a, ram leh hnam tan rah duhawm tak a la chhuah ngei ang.

CYMA chuan ruihhlo donaah Aizawl hi zone 10-ah ṭhenin, zone tinah ZADS a din a, ZADS tinah a huam chhunga YMA branch tin aṭangin member an awm. Ruihhlo do dan a mumal zawk theih nan leh a chak zawk theihna tura ZADS an din hi a lawm awm a, nasa takin awmzia a neih a beiseiawm. ZADS Zone-II phei chuan February 23, 2026 khan heroin an man tawh nghe nghe a ni.

Ruihhlo do ho a hautak a, Central YMA hnuaia ruihhlo donaa thawk chhuakte phei chu inpekna thûk tak nen mahni insengsoa che ṭhin an ni a, an fakawm. An ti ta sa sa, ruihhlo laka ram leh hnam chhan turin theihtawp chhuah se, fimkhurna erawh theihnghilh lo se.

CADS leh ZADS-te hi Mizoram mipui aiawha che chhuak an nihna lai a awm. An hmalakna hi Mizoram leh Mizo ṭhalaite chhan chhuahna leh venna tur a ni tih mipuiin kan hriat a, kan ṭawiawm ṭhat a pawimawh. Anmahni tihnualtu ni loin, an thâ tichaktu nih tum tlang ila; an hmalaknaah sum leh pai leh thil dang mamawh an nei nual ang a, chungahte chuan bengvar thei ila a duhawm.