Kawng laitute vil ngun a ṭul

Aizawl District Disaster Management Authority hotute leh sorkar department hrang hrang aiawh telna Joint Mitigation Team chuan February 24, 2026 khan Aizawl West Bypass Road Sihhmui-Muallungthu panna kawng laih mek an tlawh a, kawng laihna vûng paih dan an endik.

Sorkar thuchhuah tarlan danin, Joint Mitigation Team hian Muallungthu bula Mauphir lui leh Tuisik lui chu nikum fûr lai khan kawng laihna vûngin a chhilh nual tawh. Mauphir lui hian Tuisik lui a fin a, Tuisik luiin Tlawng lui a fin leh. Leivûngin km 2 chuangin Tlawng lui a la thleng lo, tih a ni.

Sorkara thuneitu hrang hrangte telna Joint Mitigation Team-in Aizawl West Bypass Road laih mek an endik hi a lawmawm a, rah ṭha a chhuah ngei turah ngai ila; chutiang tur chuan theihtawp chhuah chhunzawm zel rawh se.

Joint Mitigation Team-in an enfiah chin hi tarlan chian a ni lo a, hmun tarlan chu Muallungthu lam chauh a ni. Muallungthu bula Mauphir lui leh Tuisik lui ni lo hi hmun dangah Tlawng lui fintu lui te tam tak a awm a; chungte chu kawng laih chin zelah uluk leh chîk takin endik zel a ngai dawn a ni.

Kawngpui sial a nih hian, kawng laihna bul kawng thlang lama leivûng hnâwl/paih thlâk phal a ni lo a, a paihna hmun tur bik siam (spoil bank)-ah chauh paih tur a ni, tih a ni. Spoil bank-a paihna senso pawh project-ah a tel tih a ni bawk.

Aizawl tlâk lama khawpui hêlna tur kawng laihah hian, leivûngin Tlawng lui a la thleng lo tih hi thiam inchantirna tur a ni lo. Kawng laitute'n dan loin kawng laihna thlang lamah leivûng an hnâwl thla em, dan an zâwm ṭha em, tih hi a pawimawh lai a ni. Kawng siamtute'n dan an zawm ngei theih nan thuneitute'n an thuneihna an lekkawh tur a ni a, dan zâwm loa thil an ti a nih chuan an hrem ngam tur a ni.

Tunah ṭhál vanglai a ni mek a, tun aṭanga thla thum a vei leh chu fûrpui a ni leh dawn. Aizawl West Bypass Road sial mekah lei laih tawh chin zela leivûngte fûr ruahtuiin Tlawng luia a len luh loh nan tun aṭanga hma lo lâk lâwk a, a venna tur lam buaipui a ṭul. Kawng laitute uluk zawk leh khauh zawka vil ni rawh se.