Chi bil tan hmalak loh ni se
March 23, 2026 khan Assembly session-ah Chief Minister put luh, 'Sialkal Range Development Council Bill, 2026' sawiho a ni a, pawm a ni lo a, Assembly Select Committee zir chian tura dah a ni.
CM sawi danin, SRDC Bill hian khaw paruk a huam a, chungte chu Saitual district-a khaw pali leh Champhai district-a khaw pahnih a ni a, MLA bial pahnih a khawih. Kum 2012 khan Sialkal Tlangdung Development Board a ding a, kum 2013-ah Sialkal Range Development Council tih a ni a; Sialkal tlangdung hmasawnna tura hma latu atana din nia sawi a ni.
Assembly House-a SRDC Bill pharh a nih hma ni, February 22 khan Central YMA chuan thuchhuah siamin, Mizorama chengte chu chi bil zawnga hma la lo tur ngenna a tichhuak a, "Kan hnam inlungrualna tichhe thei chi bil zawnga hmalakna, chi bil hamṭhatna tur leh dâwmkânna tur zawnga hmalak bikna hrang hrangte ti lo turin sorkar, kohhran leh pawl hrang hrang kan ngen a ni," an ti.
YMA Inkhawmpui Lian 2025 rorelah, 'Zo hnahthlak chi pêng hrang hrang Mizorama chengte zingah, chi bil hmalakna a awm tawh loh nan CYMA-in hma la rawh se,' tia rêl a lo ni tawh.
Zo hnahthlak chi pêng eng emaw zat a awm a, kan pianna leh seilenna azirin hnam khat pawh rilru sûkthlêk a inang lo thei viau. Zo hnahthlakte ngaihtuahna inang lo karah chuan Mizoram hi zai khata kan luan za theihna a ni a, YMA pawh min phuar khawmtu ṭangkai a ni. Chuvangin, chi bil anga hmalak leh chi bil tana hmalak an duh loh thu YMA-in an puang hi a àwm viau.
Hnam bil tana ngaih theih hmasawnna hna thawktu tur din hi Mizoram kal zel tur ngaihtuahin a fuh lo zawk theiin a lang. Tun hnu zelah fimkhur taka kal ni se; Mizo hnam inpumkhat zel nan hnam bil hamṭhatna tur ang chi hi chu buaipui chiam lo ila, Mizo pumpui huap zo tak ni zel rawh se.
Mizoramah hian hnam bil chênna hmun bik a awm nual a, hmasawnna rualkhai lo vangin chi bil rilru an put phah fo niin a lang. Chunga chengte chuan chi bil rilru an put loh nan leh an khawsakin hma a sawn a, an lo changkan ve theih nan an tan bika council/committee/board din hluai si loin, sorkarin Mizoram hmun tinah hmasawnna rualkhai taka a kalpui a ngai a ni.