Rui buai hremna

Home Minister chuan Krismas vuakveta mante chu a rei lo berah thla khat tantir an nih dawn thu a sawi a, mipuiin him leh hlim taka Krismas an hman theihna turin ruihhlo leh zu ruih avanga buaina siamte an dim loh tur thu a sawi.

Hunpuiah hian khawtlangin duty an siam ṭhin a, hei hi khawtlang himna tura tih a ni. Hetih hunlai hian mipui an heheu a, chawlh hun a nih bawk avangin khawlaiah an leng chhuak nasa a, mipui an zalen. Hei hi remchangaa lain rukru leh misual an inlar a, ruih avanga buaina siam ching an tam a, khawtlang duty neih hi a
ṭul hle a ni.

Hetihlai hian tunlai khawvelah chuan dan hi zah tur a ni a, dan ngaih pawimawh a nih loh chuan mahni thua dan siam ngawt hi a him lo. Khawtlang duty
ṭhahnemngai fal deuhin an veng leh khaw chhunga mi an mante chungah an duh angin rorelna an lek kawh mai ṭhin a, dan pela an kal palh a nih chuan khin let theih an ni tih an hriat a pawimawh hle.

Home minister thusawi pawh hi mipui tan a muanawm hle mai a, chutihlai chuan dan anga thla khat tal tantir a nih loh chuan Krismas vuakvet a nih vang ngawta tan reitir hi chu thil danglam tak a ni. Ruih vanga buaina siamte hi chu krismas dawn loah pawh hremna hi ngai reng se la, hremna hi tihnep lam aiin hunpui loah pawh buaina siam hi chu dim loa thla khat aia rei lo tantir zel theih ni se a ṭha awm e.

Hunpuiah mipui himna leh muanna zawn a ngai a, chumi atana sorkarin ruahmanna a siam hi a lawmawm. Hunpuia thiltisual mante ang thoin ṭum danga zu rui leh ruih vanga mante pawh hi hrem ni ṭhin se, Mizoramah ruih vanga buaina thleng pawh a tlahniam deuh mahna.