Chapchàr Kût hun siamrem a fuh

Art & Culture Minister chuan, Mizo ṭhalai tam tak telna pahnih - Chapchàr Kût leh KṬP General Conference a inrual loh nan Chapchàr Kût hman hun a siamrem a, kumin aṭang chuan March thla Zirtawpni vawi hnihnaah hman ṭhin tawh tur a nih thu March 2, 2026 khan Assembly House-ah a puang.

Hun eng emaw chen chu March thla Zirtawpni hmasa berah Chapchar Kût hman a ni ṭhin a, March thlaa Pathianni hmasa ber behchhanin KṬP General Conference hman a ni ṭhin bawk. Hei vang hian Chapchàr Kût leh KṬP inkhawmpui lian hman hun a inrual ṭhin.

Chapchàr Kût leh KṬP General Conference hi a inrual fo avangin ṭhalai tam tak an tel kawp thei lo a, a khawi emaw zawk zawkah an tel thei lo ṭhin. Heng hunpui pahnih hi a hlu ve ve a, tel ve ve theite tan tel ve ve theih a châkawm em em. Ṭhalaite an tel kawp ve ve theihna tura sorkarin rilru zau tak púa Chapchar Kût hun a siamrem hi a ṭha a, ṭhalai tam tak tan a lawmawm hle ang.

Hetih lai hian, mi ṭhenkhat chuan kohhran pakhat ṭhalai pawl inkhawmpui lian vanga Chapchàr Kût hun sawn hi an hrethiam lo a, an sawisel niin a lang. An sawisel hi a àwmna lai pawh a awm.

Hmânlai thil hre zawkte sawi dan chuan, Chapchàr Kût hi ni bik a awm ngai lo a, chap chàr àwllèn lai hun remchangah an hmang ṭhin. Hun rei tak chu Zirtawpni-ah hman a ni ṭhin a, mahse, Zirtawpni hi Chapchàr Kût ni bik a ni chuang loa sawi a ni. March thla chawlhkar khatna Zirtawpnia hman ṭhin pawh hi hmân deuha vuah chawp tho niin an sawi.

Chapchàr Kût ni bik neih hi a ṭha reng a, thil hrang hrang, ruahmanna siam leh hmalaknaah a awlsam phahin a rinawm. Chutih rualin, ni bik nei - pian ni, din ni, thih ni, adt. ang maia tihdanglam theih loh tawp anga ngaih erawh a fuh ber lo thei.

KṬP General Conference hi Mizorama ṭhalaite punkhawmna lian ber a ni a, kuminah pawh kal an tamzia kan hmu. KṬP inkhawmpui lian nen insu buai lo tura Chapchàr Kût hun a siamrem a ni hi a ṭha zawkah ngai tlang thei ila a duhawm.