Râltlânte khuahkhirh ṭhat a ṭul

Assembly session neih mekah March 2, 2026 khan Home Minister chuan, ráltlânte an sumdawn phal a ni lo a, khap a ni a nih thu a sawi a, "A rûkin sumdawng deuh ni âwm tak a ni. Theihtawpin kan inchhui zel a, hriat theih chinte chu inkhap a, man ṭulte man a ni," a ti.

Assembly House member pakhatin Myanmar aṭanga Mizorama rawn ráltlânte chu Mizoram páwn lam, Silchar leh Guwahati-ah te an duh duhin an kal nia a lan thu a sawi. Delhi lamahte pawh awlsam takin an kal ṭhina sawi a awm bawk.

Mizoramah a ni emaw, India ram chhung hmun dangah a ni emaw, ráltlânte hi an duh duhna hmuna an awm phal a ni lo a, sorkarin a ruahman angin an awm tur a ni. Hei hi Myanmar aṭanga rawn lutte'n an hriat reng a pawimawh.

Myanmar aṭanga sahimna zawnga Mizorama rawn raltlante hi a tam ber chu Zo hnahthlak an ni a, kan unaute ni mah se, ram dang mi an nih miau avangin an Mizopui, India khua leh tuite anga an duhna hmun apianga an kal a remchang lo. Hei hi anmahni pawhin an hriat chian a ngai a, dan bawhchhe lo tura an inven a ṭul.

Ráltlânte dan loa an chêt vel loh nan sorkarin a vil uluk a, khauh lehzuala a khuahkhirh a ngai a, sorkarin ṭan la lehzual rawh se. Khawtlang hruaitute'n an khua leh veng ṭheuha ráltlânte an vil ṭhat a ṭul bawk.

Ram dang mi tan dan angin India khua leh tui an nih theih a, hei hi Myanmar aṭanga kan unau rawn lutte leh hnam dang daih tan pawh dil theih a ni. Dan anga India khua leh tui ni turin India ram chhunga awm rei zawng a pawimawh a, tih tur hrang hrang a awm bawk. Myanmar aṭanga Zo hnahthlakte rawn ráltlânte hian India khua leh tui an ni duh a nih chuan dan angin an dil mai tur a ni.

Mizorama ráltlânte chhin-chhiahna, biometric enrolment sorkarin a buaipui mek a, February 5, 2026 thleng khan Myanmar ráltlân mi 26,381 chhinchhiah tawh niin, la chhinchhiah loh mi 1,974 an awm. Biometric enrolment hi a nih dan tur ang taka hman a, anmahni khuahkhirhna atan hman ṭangkai zui ni se a ṭha hle ang.