Sawhthing chak zawkin buaipui ni se
Mizoram Agriculture Marketing Board hotute sawi danin, March 2, 2026 thleng khan Mizorama sawhthing thartute'n sawhthing hralhna leh leina tura siam secondary collection centre-ah sawhthing kg 5,20,151.60 an hralh tawh.
March 2 thlenga sawhthing hralh tawh chu sorkar rate bituk, kg-ah Rs 50 ang chuan Rs 2,60,07,580 man a ni. Sawhthing leitu sumdawngte'n kg-ah Rs 50-in an lei lo a, sorkarin rate a bituk hniam ber angin an lei a, a man pawh sawhthing thartute hnenah an pe nghala sawi a ni. Sumdawngte'n an leinain sorkar rate pangngai a phâk lohna chu sorkarin a thartute hnenah a pek belh ang.
Sorkarin kumina sawhthing lei ṭan hun a bituk chu February 2, 2026 ni mah se, lei ṭan a ni lo a, February 9-ah sumdawngte'n an lei ṭan. Sorkarin lei ṭan hun tura a tihah lei ṭan theih a ni lo hi a zialo angreng a, nghawng eng nge a neih dawn tih hriat a la ni lo a, a pawi thei a, thil pawi tak a ni lo thei bawk.
Sawhthing lei ṭan hun bitukah lei ṭan ni lo mah se, February 9 aṭanga lei ṭan a ni ta hi a lawmawm. Nikum 2025 ai chuan kut hnathawktute'n an hralh hma hret a, a lawmawm a; mahse, kut hnathawktu, tlang ram lo neitute tan chuan a tlai mah mah thoin a rinawm.
Tlang ram loneihah hian hunbi hrang hrang a awm a; lo vah hun, lo hâl hun, mangkhawh hun, thlai chi thlâk hun, thlâm sak hun, hlo thlawh hun, adt a awm vek. Chu'ng hunbite chu kut hnathawktute tan bawhpelh hleih theih a ni lo.
Tlang ram loneiha hunbi awm dan hi sawhthing buaipuitu thuneitute'n an ngaih pawimawh ve a ṭul a, ngai pawi-mawh duh lo a, sorkar aṭanga sawh-thing buaipuitute remchanna leh awlsamna ringawta an kal chuan kut hnathawktute tan harsatna nasa tak an siam thei. Chutiang a nih chuan, kut hnathawktute ngaih pawimawh tâwk lohna a ni ang.
Sorkar lam hian anmahni remchanna ringawt thlir loin, kut hnathawktute remchanna leh an hunbi ngaih pawimawhsak se. Sawhthing hralh leh leiah pawh, kumina ringtharah a hun taka hna an thawh theih nan a rang thei ang bera sawhthing lei zo turin mawhphurhna neitute'n inpekna thûk lehzual nen chak taka hma an lak a ngai a ni.