CAB duh lotute leh police

Citizenship Amendment Bill, 2019 (CAB) duh lo zirlai rual, social media hmanga inhûi khawm, 'Zoram Revolution Movement' (ZRM)-te chuan tun hnai khan MNF pisa, Mizo Hnam Rûn kawt leh Vanapa Hall kawtah CAB duhlohna lantirin, sit-in demonstration an huaihawt. Hnam Rûn kawta CAB duh lohna thuziak kenga ding mi 53-te chu police-te'n Aizawl SP office-ah an hruai lui a ni. Police-te chuan, MNF lam nena boruak ṭha lo zawk a awm an hlauh vanga hruai an nih thu an sawi. Hun eng emaw chen Aizawl SP pisaa awmtir an nih hnuah thubuai siamsak loin chhuah leh an ni. 

He thil thlenga kan police-te chet dan hi video-a lak niin engkim chiang takin a hmuh theih a, dan hre zawkte chuan police-te chet dan hi an dem hle. Chutihlaiin CAB/ CAA thlawptu lam party office kawta ding an nih avangin boruak ṭha lo chhuak palh thei venthawn thua police lam chet dan hi thil tih ngai loh erawh a ni kher awm lo e. Kan hriat chian ngai ta erawh chu kan ṭhalai rualte hi tu fuihpawrh mah ni lo, zirlai pawl in tel khawm pawh ni lo, social media aṭanga ram an vei avang leh CAB/ CAA hi kan ram tan a ṭha lo thei dawn nia an ngaih avanga kal khawm an ni. Heng ṭhalai rualte hi buaina siam tum an ni lo a, democracy ram a nih anga an ngaihdan puang chhuak a, an thil duh loh lantir tura kal khawm mai an ni. 

Police lamin an man khawm dan en kha chuan an duh lo chung kuah betin an man bet a, an hruai lui a ni. Ṭhalai rual zingah hmeichhiate pawh an tel a, an 'dikna' au chhuahpuiin police-in an man ngawt mai an hriatthiam loh thute an sawi a, huaisen takin an au chhuak. CAB/CAA duh lotu ṭhalai rual hian punkhawm leh an la tum a, democracy ramah dan bawh chhe loa an duh zawng leh duh loh zawng au chhuahpui leh an tum a; he huna kan police-te chet danin ngaihven a hlawh lehzual dawn a ni.