Hnam dang nupui pasal neih chungchang
Central YMA chuan March 4, 2026-a thuchhuah an siamah, tun hnaia Assembly House-a pawm tâk, ‘The Mizo Marriage and Inheritance of Property (Amendment) Act, 2026’ chu hnam dang pasala neih a ṭhat lohzia leh a pawizia tarlanna ṭha taka an ngaih thu an tarlang. CYMA hian YMA Inkhawmpui Lian 2025-ah 'Mizo hmeichhiate'n hnam dang pasala an neih zel loh nan CYMA hian inzirtirna nasa zawkin kalpui rawh se,’ tiin an lo rêl tawh a ni.
MZP President pawhin March 5, 2026-a Zoram Ni hmannaah The Mizo Marriage and Inheritance of Property (Amendment) Bill, 2026 pawm tâk chu an thlawp thu a sawi bawk.
Mizo hmeichhe ṭhenkhatin pasal atana hnam dang an nei hi mi tam takin an helh a, an sawisel ṭhin. YMA leh zirlai pawlte phei chuan pasalah hnam dang nei lo turin an inzirtir a, an infuih ṭhin. Chutihlaiin, mi tam tak chuan an hrethiam viau tho bawk.
Mizo pipute khan hnam dangin an chiahpiah hmain pasalah hnam dang an nei lo a, hun a kal a, hnam dangin min chiahpiah tial tial a, pasal atana hnam dang nei pawh an awm chho a, tunah chuan chhiar fé tham an awm tawh.
Mizo hmeichhia, hnam dang pasal nei zinga tam tak chu an inti-Mizo em em a, an fate pawh Mizo ṭawng thiamtir a ni. Hnam dang hmuhah leh an awmna velah Mizo nun zia, ṭawng leh nunphung te an pho chhuak a, chungte chu Mizo hnam tan a ṭhatna tak a awm ve thei àwm e.
Khawvel ṭhang zel leh hnam dangte nena kan inchiahpiahna hian nupui pasala inneih pawlhna a thlen tih hi kan pawm ve a ngai. Mizoramah hian hnam dang an la tam tulh tulhin a rinawm a, hnam dang nupui/pasal nei pawh an pung zelin a rinawm. Hei hi khawvel nunphung pakhat a ni a, kan hriatthiam ve a ngai.
Hnam dang nupui pasala nei lo tura inzirtir hi a ṭha a, tih zel tur a ni. Hnam dang neih loh hi a ṭha ber a ni mai thei a, chutihrualin, hnam dang neite ṭawngkam chhe tak takaa sawi zui kher erawh insûm a ṭha.
‘The Mizo Marriage and Inheritance of Property (Amendment) Bill, 2026’ pawm takah, Mizo hmeichhiain hnam dang a neih avangin Mizo a nihna a bo tih a awm lo a, tribal an nihna erawh a tawp dawna sawi a ni. Hnam dang neih vanga 'Mizo nihna bo' tih a awm loh avangin hemi chungchanga inhnialna hi awmze nei lo a ni.